Napagod sa pag-ibig

Ang ganda ng pangangatawan ngayon ni Gian Magdangal at balik gym uli ito matapos ang Phil Idol.

Lagi rin siyang in the mood dahil sa magandang takbo ng kanyang career ngayon. Kasama sana siya sa cast ng Miss Saigon sa Korea pero mas pinili niya ang Phil Idol at hindi naman siya nagsisisi kahit hindi siya ang nanalo.

"Okey lang, nakarating din naman ako sa Araneta at naging daan iyon para kunin ako ng GMA Network," sabi ni Gian. Bale tinawagan ng GMA si Jolina Magdangal na pinsan niya. At agad isinabak na siya sa SOP at isinama sa Four Men Only kasama sila Dingdong Dantes, Dennis Trillo at JayR.

Malaki ang naitulong sa kanya nang napanalunan niya sa Phil Idol na P250,000. Yung P100,000, ipinambayad daw niya sa mga utang nila sa bahay. At yung P100,000 pa ay nakatabi na sa savings niya. At ang natirang P50,000, ang ginamit niyang panglibre sa mga taong nagmalasakit sa kanya lalo na sa mga ka-officemates niya sa Smart kung saan nasa marketing department ito.

May nagpaparinig daw sa kanya na kukunin siyang endorser ng Smart pero ayaw munang maniwala ni Gian hanggang wala pang final na offer sa kanya.

Walang lovelife ngayon si Gian after nilang mag-break ni Aiza Marquez last year ng Sept. Masyado raw siyang napagod dahil sa loob ng one year and five months nila ni Aiza ay ibinuhos daw nito ang lahat sa dating gf.

"Oo binigay ko lahat. Pag nagmahal kasi ako, hindi ako nagtitipid. All out lahat ang atensyon ko sa kanya. But I’m okey now. I’m moving on. Magkaibigan naman kami ni Aiza hanggang ngayon," kuwento ni Gian. Si Aiza ang nakipaghiwalay sa kanya dahil gusto raw nito ng space.

Ngayon ay naghahanda na rin siya ng materials para sa gagawing solo album niya sa GMA Records. Sinisiguro rin ni Gian na taun-taon ay kasali siya sa anumang musical o stage play dahil sa kakaibang happiness at discipline na nakukuha niya sa teatro. Katunayan ay ready na siyang mag-audition sa play ng Avenue Q na inihahanda ng Atlantis Production sa ating bansa.

Si Gian ay 25 yrs old at graduate ng St. Benilde sa kursong Business Administration.