Now Na, gusto sana ni Joey na itapat sa GKNB?

Maraming natatanggap na tawag at e-mails sa opisina ng Focus E Inc tungkol kina Sexbomb Louise at Mhyca dahil sa magandang role nila sa Daisy Siete Season 13 na Moshi Moshi Chikiyaki.

Ang iba naman ay nagsasabing best choice raw na kay Mhyca binigay ang role bilang younger sister ni Rochelle. Hindi makapaniwala ang grupo ni Joy Cancio na malakas pala ang dating nina Louise at Mhyca.

Ang katwiran ni Joy ay, "Ganun po talaga siguro pag sa grupo, may kanya-kanyang bet ang fans. Parang sina Rochelle at Jopay noon na pilit pinag-aaway.

"Tapos naging Mia versus Sunshine naman as SB Kontrabida. Di ba muntik pa ngang mag-away-away ang mga ito dahil muntik na ring maapektuhan noon ang samahan nila?

"Sa kaso naman nina Louise at Mhyca, siguro dahil sabay silang pumasok ng Sexbomb kaya laging sila ang naikukumpara sa isa’t isa."

At sa nalalapit na season 14 ng Daisy Siete ay balitang isa uling action drama with dance elements, ang concept at balak daw na gawing magkatunggali ang dalawang Sexbomb.

Pero ayon sa manager ng Sexbomb girls ay nasa planning stage pa lang naman ang magiging character roles ng dalawa dahil kasalukuyang nagbi-brainstorming pa kung ano ang best role sa bawat isa.

* * *

Abut-abot ang pasalamat ng magulang ni Pinoy Dream Academy Grand Star Dreamer Yeng Constantino sa anak nila dahil nagkaroon sila ng bahay na matitirhan.

Last Friday ay ibinigay na kay Yeng ni Mr. Delfin Lee ng Globe Asiatique ang condo unit na fully-furnished na napanalunan niya at matatagpuan ito sa Edsa cor, Boni Avenue, Mandaluyong City na nasa 27th floor.

Kasamang lumipat ng batang musikera ang kanyang magulang at pinsan na siyang aalalay sa lahat ng lakad niya.

Cute ang unit at mga gamit ni Yeng dahil bumagay sa height niya, may dalawang kuwarto sa itaas (loft) na para sa magulang niya at sa pinsan niya at ang relaxation room sa baba adjacent sa kitchen ang gagawing kuwarto ng dalaga overlooking sa buong Mandaluyong.

"Bagay po ako rito habang gumagawa ng kanta na nakaharap ako sa bintana," saad ni Yeng.

Nung araw ding ‘yun ay nakuha na rin ni Yeng ang Silver Suzuki APV family wagon na 8-seater na supposedly ay kotse pero pina-convert niya sa isang wagon para raw makasama niya ang buong pamilya niya.

* * *

After ng game show na Now Na ni Arnell Ignacio ay papalitan naman ito ng Skating with the Stars na mapapanood din sa QTV.

Pawang celebrity ang guests sa nasabing programa ng tv host comedian at co-prod ang GMA-7 at Viva Entertainment.

Ayon pa sa taga-Viva ay baka sa Mall of Asia raw ang taping dahil mas convenient ang lugar kumpara sa Megamall na medyo masikip na.

Samantala, nagpo-protesta naman si Joey de Leon na sana’y hindi na lang patayin ang Now Na! at ilipat na lang ito sa GMA-7 pangtapat sa Game KNB? ni Kris Aquino. — Reggee Bonoan