60 bata ang papag-aaralin ng libre ni Robin sa pasukan

Nag-click ang love triangle nina Olyn Meimban, Matt Evans at Melissa Ricks sa Pedro Penduko kaya naman sila ang feature sa Your Song na may episode title na Pangarap Lang na kinanta ni Pinoy Dream Academy grand star dreamer, Yeng Constantino.

Very vocal sina Matt at Olyn na sila ang magkarelasyon pero marami pa ang hindi naniniwala dahil ang alam daw ay si Melissa ang tunay na girlfriend ni Pedro.

Buti na lang at sport lang si Olyn dahil tanggap niyang sina Matt at Melissa talaga ang magka-loveteam at ka-love triangle lang daw siya.

* * *

Maraming nagtatanong na taga-GMA 7 kung bakit matagal na raw na-shoot ang Rounin ng ABS-CBN, pero hanggang ngayon ay hindi pa raw ini-air?

At true raw ba na nag-reshoot ang nasabing anime’ program na pinagbibidahan nina Shaina Magdayao, Rayver Cruz, Diether Ocampo, Joross Gamboa at iba pang young stars ng Star Magic?

"Mahirap kasing gawin ang anime’ at nung i-preview ng mga bossing ng Dos, e, nakukulangan pa sila, so inaayos pang mabuti especially the fight scenes.

"Walang ni-reshoot o iniba, ini-improve kasi nga anime’ para sa satisfaction ng viewers," katwiran sa amin ng taga-production ng Dos tungkol sa tanong ng taga-Siete.

Naisip daw kasi ng mga taga-drama production ng GMA-7 na sadyang hindi pa talaga ie-ere ang Rounin’ dahil tatapatan nila ang Lupin ni Richard Gutierrez na isa ring anime’.

Dagdag pa, "Gaano ba kaganda ang Rounin’ na ‘yan at one year in the making na? ‘Di kaya pelikula na ‘yan?"

Any reaction from Rounin staff?

* * *

Sobra talaga ang pagtulong ni Robin Padilla sa mga kapatid niyang Muslim dahil ang malaki niyang bahay sa Maple Street, Fairview Quezon City ay ginawa na niyang pre-school at mag-uumpisa nang mag-operate ngayong Hunyo.

Kaya ang bida ng Asian Treasures ay nakatira na lang sa isang kuwarto na nasa loob ng malaking bahay.

Kung dati’y pawang mga gamit ni Binoe ang nasa loob ng malaking kabahayan, ngayon ay pawang gamit na ng mag-aaral, pati ang dating gym kung saan kumpleto sa gamit ang aktor ay naiba na rin.

"Sa dressing room na lang niya natutulog si Binoe. Sabi ko nga, nakikitulog ka sa mga lagayan mo ng damit," tsika ng manager niyang si Betchay Vidanes.

Nakita na namin ang malaking dressing room na ito ng aktor noon at totoong sangkaterba ang mga damit niya, lalo na ang mga costumes na ginagamit niya sa shootings.

"Ganun pa rin, hindi nagbago, medyo nabawasan lang ng konti, pero ‘yun pa rin. May isang kama ro’n at doon natutulog ang lolo mo at bago lumamig ang kuwarto, dapat tatlong oras nakabukas ang aircon bago siya pumasok dahil nung naroon ako, isang oras nang bukas ang aircon, e, wala pang lamig akong nararamdaman kasi nga maraming damit," natatawang kuwento sa amin ni Betchay.

Sa darating na pasukan ng mga bata ay may 60 na pag-aaralin ang aktor at sagot niya lahat ang gastusin.

Nabili na rin ni Robin ang katabing lupa ng bahay niya at ginawa niyang playground para sa mga bagets during recess time.

"Lahat ng talent fees ni Robin na nakukuha sa commercials, may kinapupuntahan na, ganun siya kadetalyado ngayon," dagdag kuwento pa sa amin.

Kaya naman tuwang-tuwa raw ang aktor nung i-renew siya ng Islander at Pop Cola. — Reggee Bonoan