Jolina, pumasang 12 anyos

Eighteen years na si Jolina Magdangal sa showbiz at sa loob ng 18 taon ay nakagawa na siya ng halos 70 product endorsements na patuloy pa rin niyang ginagawa hanggang ngayon. 

Katunayan, siya ang napisil bi- lang pinakabagong celebrity endorser ng Sundance Direct Sales, isang kilalang network marketing company na nagdi-distribute ng iba’t ibang consumer products tulad ng mga footwears, apparels, accessories (tulad ng bags, socks, wallets at iba pa), undergarments, colognes, cosmetics at children’s product line.

Kahit 28 yrs. old na si Jolina ay pwede pa rin itong mapagkamalang isang tinedyer. Katunayan, sa Vienna (Europe), nakalusot ito bilang 12 anyos nang minsang may pinuntahan sila ng kanyang family na puwede lamang makapasok kapag may isang minor na kasama. 

Nang tanungin ang daddy ni Jolina na si Jun Magdangal kung ilang taon na si Jolina ay sinabi nitong dose kaya kaagad silang pinapasok.

Hindi ikinakaila ni Jolina napapag-usapan na rin nila ng kanyang boyfriend of six years na si Atty. Albert ‘Bebong’ Muñoz ang pagpapakasal pero hindi umano ito mangyayari early next year dahil abala si Bebong sa paghahanda sa kanyang pagpasok sa pulitika sa darating na halalan. 

Siya’y kakandidato sa pagka-congressman sa ikalawang distrito ng Caloocan at 100% ang ibinibigay na suporta ni Jolina sa kanya.

Ang target umano ni Bebong na tulungan ay ang mga kabataan. Nagmimistulang fans day ang bawat lugar na bisitahin nila ni Jolina.  

Hindi na nga naman nila kailangan pang pumila sa SOP at Starstruck para lamang makita nang personal ang ka-loveteam ni Marvin Agustin.

May plano rin bang pasukin ni Jolina balang araw ang pulitika tulad ng Star for All Seasons na si Vilma Santos?

 "Ayokong magsalita ng tapos, pero hangga’t maaari ayoko. Mas gusto kong suportahan na lamang si Bebong," ani Jolina na ang bagong hairdo ay ginagaya ngayon ng marami ng mga kababaihan. —ASTER A. AMOYO