Jean, di nakikialam sa lovelife ng anak

Nag-react ang sosyalerang actress na si Jean Saburit sa siyeteng nakikialam siya sa lovelife ng kanyang nag-iisang anak na si Nicole Anderson kaya hindi ito natuloy kay Mark Herras at palagi raw niyang binabantayan ang anak sa mga lakad nito.

"Excuse me, kailanman hindi ko ginawa yan. Wala akong pakialam sa pag-ibig ng aking anak," sabi ni Jean.

Wala raw siyang alam, kung bakit hindi nagtagal ang panliligaw ni Mark kay Nicole. Ang alam niya, tahimik na bata si Nicole. Pulos pag-aaral ang ginagawa sa bahay. Nag-aaral sa British school si Nicole at isang magaling na estudyante doon. Bihira rin itong lumabas ng bahay.

"Palagi ko kasi siyang tini-text kapag inaabot ng gabi, kapag may party na pinupuntahan. Sa panahong ito, sinong ina ba ang papayagan na umagahin ang kanyang anak sa kalye? Ibang panahon ngayon, kaya dobleng pag-iingat ang ginagawa kong pagbabantay kay Nicole," kwento pa ni Jean.

Bibihirang makaalis ng bahay si Nicole na hindi kasama si Jean. No wonder, nagtataka siyang nabalitang palaging kasama sa mga lakad ni Mark si Nicole. Lately nga, nabalitang naalangan si Mark kay Nicole dahil rich ang family nito. Balita ngang sa Sweden pa balak nitong mag-Pasko.

"Hindi ako tumitingin sa pera pagdating sa mga lumiligaw sa anak ko. Gusto ko ang lalaking mabait at may takot sa Diyos," aniya pa. — Vir Gonzales