Yeng, RJ, isa pang relasyong nabuo sa Pinoy Dream Academy

Nakatakdang umalis na ng Pilipinas ang American Idol finalist na si Jasmine Trias dahil tapos na ang palugit na ibinigay sa kanya ng Bureau of Immigration and Deportation para sa pag-stay niya rito sa Pilipinas.

Pero naaksidente ang boyfriend ni Jasmine na si Kris Lawrence nung Friday, the 13th of October sa taping ng Your Song at nagtamo ito ng malalalim na sugat sa magkabilang kamay na naging sanhi para tahiin ang kaliwang kamay ng binata.

"Napalakas ang pagtabig ni Geoff (Taylor) kay Kris sa taping at dumiretso ito sa salamin at nabasag, punumpuno ng bubog ang magkabilang kamay ni Kris, iyak nang iyak si Jasmine," kuwento sa amin ng taga-YS.

Kaya’t malaking kuwestyon kung makakaya bang iwan ni Jasmine ang boyfriend ngayon.

Matatandaang pinauwi si Jasmine ng Philippine Idol para magbigay suporta sa grand finalists ng PI at the same time, para madalaw at makasama na rin ng dalaga ang boyfriend niyang si Kris Lawrence na taga-ABS-CBN.

Pang-ilang aksidente na ito ni Kris kaya’t pinag-iingat siya dahil ito raw ang signos niya?

* * *

Imbes na magsaya’t magdiwang si PDA scholar Yeng Constantino dahil siya ang napiling Star scholar for the week sa nakaraang Gala Performance Night last Saturday ay ngumangalngal itong nagtapat kay headmaster Jim Paredes na hindi siya masaya dahil napalayas na si RJ Jimenez sa loob ng academy.

Si RJ lang daw ang nagpapasaya sa kanya sa loob ng academy at maski raw nag-aaway sila ay love niya ito.

Kaya naman binigyan ni headmaster Jim ng sapat na oras na makapag-sarilinan sina Yeng at RJ bago umalis ng akademya ang binata.

Marami ang nagulat dahil hindi lang daw simpleng magkaibigan ang relasyon ng dalawa dahil bakit kakaiba ang yakapan nila at nabanggit pa ni Yeng na, "Paano na ako ngayong wala ka na? Ano ang gagawin ko?" na sinagot naman ni RJ ng, "Dadalawin kita every Saturday, manonood ako ng performance mo, hihintayin kita paglabas mo."

Marami pang sweet moments ang dalawa na napa-puzzle din ang mga taga-PDA kung ano bang mayroon ang dalawang scholar.

At ngayong nasa labas na si RJ, aaminin na kaya niya ang tunay nilang relasyon ni Yeng tulad din nang pag-amin nina Jay-R Siaboc at Iya Ginez na more than a month na pala silang mag-on?

"Takot kasi si Yeng sa tatay niya kasi nangako siyang hindi siya magbo-boyfriend kaya ayaw nilang umamin, pero very obvious naman na sila na no?" say ng taga-PDA.

And speaking of PDA ay super-lakas daw ang 2 album nila under Star Records na sa bawa’t mall tours daw nila sa lahat ng SM Malls ay nauubusan sila ng stock.

Samantala, inamin naman sa amin ng isa sa Business Head ng PDA na si Ms. Linggit Tan na may matatanggap na royalty fee ang mga scholar na sina Yvan, Chad, RJ, Davey at Yeng.

* * *

Gaano katotoo na nagbaba raw ng order ang GMA management kahapon, Lunes sa lahat ng bossing ng shows na huwag munang ige-guest ang mag-dyowang sina Jericho Rosales at Heart Evangelista dahil pakiramdam nila ay nagagamit lang sila ng dalawa.

Buong akala raw kasi ng Siete ay makukuha na nila ang dalawa, especially Echo dahil nga wala na itong kontrata sa Dos at sa katunayan ay nakapag-guest na ito sa ilang shows ng GMA para sa promo ng first album niya at may plano na nga sa kanya ang nasabing network kung saang show siya ilalagay.

Pero bigla na lang daw naiba ang plano dahil nasa ABS-CBN pa rin daw ang loyalty ng aktor kasama na rin ang kanyang girlfriend.

Samantala, nalaman naman namin na may tv guestings sina Jericho at Heart sa Dos at una na nga ang Your Song na kung hindi kami nagkakamali ay nakatakdang kunan ito by November para na rin sa promo ng album nga ng aktor.

Tinanong nga namin ang taga-Dos kung bakit tinanggap pa uli nila ang dalawa matapos nilang ipagsabi na hindi na sila talent ng ABS?

"E, tulungan na lang, tutal Kapamilya pa rin naman sila at ABS pa rin ang pinili nila," sagot sa amin. – REGGEE BONOAN