May mga hawak na larawan ang ABS-CBN na magpapatunay na nagkikita sina Lovi at FPJ

Kung sakaling may maglalabas ng picture ni Lovi Poe na kasama ang amang si FPJ, sa mga show ng ABS-CBN ito mapapanood. Konektado sa network ang may hawak ng mga litrato ng dalagita na nagpapatunay na nagkikita sila.

Hinihintay na rin namin ang paglabas ng mga picture na may nangangabayo raw si Lovi at may isa namang naka-gown ito. Between 11 and 12 years old daw ito.

Samantala, kahit mas matanda si Cogie Domingo sa kapareha niya sa Love to Love, si Lovi pa ang nagtuturo sa kanyang ‘di siya dapat magtagal sa banyo. Inaabot daw ng two hours sa banyo ang young actor at kung anu-ano ang ginagawa maliban sa pagligo at toilet practice.

Sinabihan daw ito ni Lovi na dapat one hour lang siya sa banyo at sa labas na gawin ang ibang good grooming practices. Kapag nakausap namin si Cogie, itatanong namin dito kung sinunod niya ang payo ng leading lady.

Samantala, okey sa dalawa ang pagpasok sa Love to Love Musicale nina Jennylyn Mercado at Mark Herras. Alam daw nilang para sa ikagaganda ng show at tumatag ang rating nito ang desisyon ng management na idagdag ang dalawa.

* * *

Nakita namin si Rosanna Roces sa Rembrandt Hotel kausap si Cristy Fermin. Katatapos lang itong interbyuhin ni Korina Sanchez na kung para sa Rated K ay baka this Sunday ang airing.

May kalusugan si Rosanna pero, maganda pa rin. May kasama itong may kargang bata na ayon kay Cristy, anak ni Annabelle Regalado ng Star Records na ang husband ay cousin ni Rosanna. Paalis na ito nang makita namin at ‘di man lang namin natanong kung may balak pa siyang mag-active sa showbis.

* * *

Maiiksi ang sagot ni Jennylyn Mercado nang makausap namin sa first day taping ng Season 7 ng Now & Forever (Dangal) at may "Hindi ko alam," pa rin itong sagot. Sabi sa amin, dahil daw ito sa pinagsabihan ang dalaga ng Artist Center na ‘wag nang magko-comment sa mga isyu sa kanya para hindi na siya maintriga.

Ngiti at ‘di sumagot si Jennylyn sa tanong namin kung ano ang gagawin niya pag na-link sila ni Dennis Trillo, ang kapareha niya sa afternoon soap. Hindi tuloy namin alam kung okey lang sa kanya yun.

Nagpapa-excite raw sa kanya na makasama si Cherie Gil na kilalang magaling na actress at identified sa ABS-CBN. Okey lang kay Jennylyn na masampal at masaktan sa eksena nila.

"Excited ako na may kasamang tense at medyo napi-pressure.  Alam kong mahusay siya at sana, masabayan ko siya," banggit nito.

Magpi-premiere sa September 25 ang Dangal na sabi ni direk Mac Alejandre ay tungkol sa pag-ibig, kaligayahan, pagdurusa at paghihiganti. Nasa cast din sina Melissa Mendez, Desiree del Valle, Katya Santos at marami pang iba na ngayon lang makakasama ni Jennylyn.

* * *

Nakita namin sa GMA-7 studio si Jelaine Santos at ibinalita nitong papasok siya sa Love to Love at makaka-loveteam si Benz Pacia. Hindi pa nito alam kung ano ang role nilang dalawa’t ng araw na ‘yun pa lang ipinaalam sa kanila.

Nagtaka lang kami kung bakit kay Benz at hindi sa ka-MU niyang si Cris Martin ipinareha si Jelaine. Sabagay, mas may isyu kung si Benz ang papasok dahil magkikita sila ng ex-girlfriend niyang si Iwa Moto na girlfriend ngayon ni Yexel Sebastian.