Shooting ng GMA at ABS-CBN, sabay sa Malaysia

Magsasabay ang taping sa Malaysia ng Season 7 ng Now & Forever ng GMA-7 at soap ng ABS-CBN. Ang Malayasian co-producer ng dalawang network daw ang nagbigay ng schedule at masaya ito’t magkikita ang cast at staff ng dalawang show at ‘di sila maho-homesick.

Sina Kristine Hermosa at Diether Ocampo at Zanjoe Marudo ang alam naming bida sa soap ng Dos na ididirek ni Jerry Sineneng. Si Alfred Vargas naman ang isa sa mga artista ng N&F at isang Malaysian actress ang kanyang makaka-pareha and Mac Alejandre directs.

Sikat na sa Malaysia sina Kristine at Diether dahil sa Pangako Sa ‘Yo at Sana’y Wala Nang Wakas at siguradong sila’y pagkakaguluhan. Si Alfred ay wala pa yatang show na naipalabas doon kaya, ‘di pa siya makikilala.

* * *

Nag-text sa amin last Friday si LJ Reyes para ipaalam na aaminin nila ni Alfred Vargas sa Startalk last Saturday ang kanilang relasyon. Tinawagan namin agad ito and in fairness, kahit may klase, sinagot ang aming tawag. Lumabas muna siguro ito sa classroom para masagot ang aming mga tanong tungkol sa kanilang relasyon.

Sandali lang naming nakausap si LJ dahil may klase. Hindi na namin nabiro kung kailan official na ang kanilang relasyon, saka nadadalas ang alis ng Maynila ni Alfred. After niya itong sagutin, umalis agad para mag-shooting sa Boracay ng Binibini (o Gigil) kasama ang seksing si Katrina Halili.

Tapos, aalis ito sa September para mag-taping ng Now & Forever sa Malaysia. Ang sabi sa amin, three weeks o baka abutin ng one month ang taping at gano’n katagal silang ‘di magkikita. Ano ang mangyayari sa kanilang relasyon?

Pinuna rin pala namin ang pananaba ni LJ at sabi nito, nagdadalaga lang ang kanyang katawan at hindi sa sinasabi ng iba na hiyang siya sa pagmamahal ni Alfred. Kung anuman ang rason nang kanyang pagtaba, sana hindi na sumobra’t mahihirapan siyang magsayaw.

* * *

Nakinig si Nikki Bacolod habang ini-interview namin si Princess Violago at aliw ito sa pakikinig sa tsika ng kasama sa Viva Artists Agency at Posh ng QTV 11. Open pa rin ang offer ni Princess na i-adopt si Nikki para matulungan sa kanyang Hypoparathyrodism, isang uri ng sakit na dahil sa kakulangan ng calcium ng katawan.

Naawa si Princess nang malamang gumagasta ng P3,000 to P4,000 si Nikki daily for her medication. Pero, may two-year supply ng medicine si Nikki galing ng States kaya, nothing to worry si Princess.

Pwedeng magtrabaho sa ibang company ang talents ng VAA kaya, nag-audition si Princess sa Regal para sa MRT episode ng Shake, Rattle & Roll kasama sina Hayca Bunevacz at Ashley Gruenberg. Pinaiyak at pinatawa siya sa kanyang audition na feeling nito, nagawa niya ng maayos kaya, sana raw, makuha siya for the said movie.

Nag-meeting ang buong Violago family bago payagan si Princess na mag-showbis pero, dapat laging kasama ang ina. Segment host siya sa S Files and she donated her first pay check sa survivors ng landslide sa St. Bernard sa Leyte.

* * *

Bukas, August 15 na ang birthday ng kambal nina Marvin Agustin at Tetet Dy na sina Santiago at Sebastian. Ang request ni Marvin sa mga naimbitahan sa children’s party ay tig-isang regalo ang ibigay sa kambal para walang away. Nagbubugbugan na raw ang mga bagets at ayaw nitong pag-awayan ang regalo sa kanila.

Malalaki na ang kambal na ang picture ay nakita namin sa cellphone ni Marvin. Kahit nakabili ng apartment sa San Francisco, dito gusto ni Marvin na lumaki ang mga anak. Iba pa rin daw ang Pinoy values at ito ang gusto niyang ma-instill sa mga anak.

Sa Wednesday naman, Aug. 16 ang opening ng Oh, My Ghost na sabi ni Rufa Mae Quinto, ang mapuputi niyang kilikili ang magiging pambenta ng pelikula. Kinontra siya ni Marvin dahil ang passionate kissing scene daw ang mas pag-iinteresan ng tao na mapanood.

Nalulungkot pala si Marvin dahil malapit nang matapos ang I Luv NY nila nina Jolina Magdangal, Mark Herras at Jennylyn Mercado. Ayaw pa rin nitong sabihin kung mamamatay si Albert (character niya sa soap) dahil sa sakit sa puso.