Buo na ang EB Babes, may kapalit na ang Sexbomb!

Sampu silang nag-survive matapos ang limang linggong pananatili sa isang training camp sa Bulacan. Bukas, pormal silang ipakikilala sa Eat Bulaga bilang mga EB Babes, ang kapalit ng Sexbomb.

Bukod sa magaganda, matatawag ang 10 na mga total performers. Bukod sa talagang magagaling sumayaw ay marunong din silang kumanta at ayon sa produ ng EB na si Gng. Malou Choa-Fagar ay marami nang tumatawag sa kanya para mag-alok ng recording contract pero, ayaw pa niya. Susubukan muna niya ang loyalty ng grupo. At sasanayin muna sila sa iba pang larangan, tulad ng pag-arte.

Nakakalungkot na all the girls had to give up their studies para makasama sa EB Babes, majority sa kanila ay nasa ikalawang taon na sa kolehiyo. May isa na kaga-graduate lamang ng high school at nakatutuwang malaman na siya pa ang napiling maging lider ng grupo.

Wala silang choice kung nag-aaral nga naman sila ay hindi nila makakaya ang anim na araw na paglabas sa Eat Bulaga. Baka nga ang natitira nilang free day ay magamit pa sa kanilang training at rehearsal.

Dalawang taon ang kontrata nila sa Eat Bulaga. Wala namang masyadong kondisyong ibinigay sa kanila. Hindi ipinagbabawal ang pagkakaro’n ng boyfriend na imposible nga namang mangyari sa mga magagandang tulad nila. In fact, marami nang guys ang nag-aabang sa kanila sa labas ng Klownz Quezon Av. na kung saan sila ipinakilala sa media.

Ang EB Babes ay binubuo nina (L-R sa larawan, mula sa itaas): Angel (Coronel, Streetjazz Babe, 21 y/o, mula sa Cubao, QC; Mae (Mary Jose dela Cerna), the Acting Babe, 19, San Jose, Del Monte, Bulacan; Ann (Rose Ann Baleche), the Ballroom dancing Babe, 19, QC; Madel (Madelyn Palma), the Gymnastics Babe, 20, Cebu City; Kim (Kimberly Kate Guevarra), the Comedy Babe, 19, Tarlac; Saida (Saida Diola), the Bellydancing Babe, 18, Sampaloc, Manila; Lian (Lian Katrina Paz), the Dance Stunts Babe 18, Marikina City; Joyce (Joanna Joyce Burgos), the Cheerleading Babe, 18, Los Baños, Laguna; Mergene (Mergene Maranan), the Photogenic Babe, 19, San Jose, Del Monte, Bulacan; Belle (Marbelynne Rivera), the Diva Babe, 18, Balagtas, Bulacan. — Veronica R. Samio