Heart, nandun sa last shoot ng Pacquiao!

Ayon kay Bea Alonzo, nagkaayos na sila ni Heart Evangelista at nag-uusap na. Narun kasi ito sa last shooting day ng Pacquiao The Movie para suportahan si Jericho Rosales na leading man ng aktres.

Pero hanggang "hi" at "hello" lang ang naging batian ng dalawa.

Sa kabilang banda, nanatili silang mabuting magkaibigan ng ka-loveteam na si John Lloyd Cruz kahit alam niyang may girlfriend na ito. Masaya si Bea kahit loveless dahil matatag ang career nito at katunayan ay may bago siyang teleserye kasama si Sam Milby.

Di Tuloy Ang Movie Nina Jinggoy, Bong, Daboy At Ipe!

Gustung-gusto sana ni Senator Jinggoy Estrada na magkaroon sila ng movie ng mga barkadang sina Phillip Salvador, Sen. Bong Revilla at Rudy Fernandez pero hindi ito matutuloy ayon sa senador.

"Nagkasakit kasi si Rudy, nagkaroon naman ng hearing si Ipe at busy sa pelikula niya sa sariling produksyon si Bong. Kaya baka sa ibang pagkakataon na namin ito itutuloy." Busy si Jinggoy sa Senado kaya hindi rin makagawa ng pelikula. Tama na sa kanya ang paminsan-minsang paglabas sa telebisyon gaya ang sa Nuts Entertainment.

Cherry Pie, Takot Sa Iskandalo

May nagtanong kay Cherry Pie Picache kung ano ang gagawin nito sakaling mahuli niyang kasama ng kanyang asawa ang babae nito? Gagawa ba siya ng eskandalo?

"Takot ako sa iskandalo. Sakaling mahuli ko ang asawa ko at ang babae niya ay kokontrolin ko ang sarili ko. Pero pag-uwi ng bahay, humanda siya dahil dun ako gaganti sa kanya," aniya.

Asawa niya si Christian Vasquez sa I Wanna Be Happy ng Seiko Films.

"Masarap katrabaho si Christian dahil propesyonal siya at ang laki ng ipinagbago pagdating sa pag-arte. Akala mo’y antipatiko siya at presko pero napakabait niya," anang aktres.

Nalalapit na ang Star Awards at nominado na naman si Cherry Pie sa Best Actress Category for Bikini Open.

Naniniwala Ba Kayo Sa Hula?

Ang tema ng pag-uusapan ngayon sa Sis ay tungkol sa mga artistang nasakuna.

Nakaka-tense ang episode dahil panauhin ang mga manghuhula na magbibigay ng prediksyon sa mga artistang panauhin.

Kayo, naniniwala rin ba kayo sa hula? Tutok na sa Sis sa pagtatalakay ng mahalagang paksa ngayong umaga.

Blind Item: Sumasakit Ang Ulo Sa Ingles

Inamin ng sexy actress na gusto na niyang magpalit ng image kaya naman unti-unti na siyang nag-aaral ng pagi-Ingles. Nagbabasa siya ng English magazine at mga peryodikong Ingles. Kaya lang sumasakit ang ulo niya kapag ginagawa ito.

"Paano ako matututo gayung makakita lang ako ng magazine at magbasa ng Ingles ay parang nahihilo na ako? Hirap nga akong mag-pronounce ng mga salitang banyaga," sey nito.

Visible ngayon ang seksing aktres na kilala sa laki ng boobs.