Bakit di maiwanan ni Ethel si Alex?

Nalulungkot si Ethel Booba dahil mayroon pala itong problema sa kanyang matris at kung di maaagapan ay baka humantong sa cervix cancer. Hindi pa naman ito ganun kalala kaya balak niyang ipaopera.

"Noon ko pa ito nararamdaman nang bago pa lang ako nagsisimula sa showbiz kung saan parang may gumuguhit na masakit sa ilang bahagi ng katawan ko at pagkatapos ay nagko-collapse na lang ako.

Samantala, bakit di niya mahiwalayan si Alex?

"Talaga kasing malaki ang concern niya sa akin. Sabi nga niya, pakakasalan pa rin niya ako kahit di na ako magkakaanak. Pag-naghiwalay kami, mami-miss ko ang sex life," biro pa nito.

Princess Of Philippine Movies

Malaking karangalan kay Angel Locsin ang pagkakapili sa kanya bilang Princess of Philippine Movies ng 36th Box-Office Entertainment Awards ng Guillermo Mendoza Scholarship Memorial Foundation Award.

Nanghihinayang lang ang magandang aktres dahil hindi siya nakadalo sa parangal, gustuhin man niya dahil may commercial shoot siya at may taping pa ng Majika.

Deserving Manalo Si Gerald

Punumpuno ang Araneta Coliseum sa dami ng nanonood ng Pinoy Pop Superstar Grand Showdown noong Sabado. Pati mga fans nila, kanya-kanyang patalbugan sa kanilang mga idolo.

Pinakamalakas ang palakpakan at sigawan ng mga fans nina Gerald Santos at Aicelle Santos. Maraming tumitili kay Harry Santos dahil artista ang dating ng guwapong binatilyo.

Simula pa lang ng labanan ay alam na naming mananalo at magiging grand champion si Gerald dahil ang galing ng pagkakaawit nito ng "Kahit Isang Saglit" (Martin Nievera). Pero naging mahigpitan ang labanan nila ni Aicelle.

Nagbigay din ang PPS ng mga Special Awards gaya ng Pinoy Roadshow Superstar na pinanalunan ni Aicelle, Pinoy Pop Viewers Favorite na si Gerald at Best Album Performer na pinanalunan uli ni Aicelle.

Pumasok sa Magic 4 sina Aicelle, Gerald, Harry at Denver Regencia.

Blind Item: Na-Turn Off Ang Mga Fans

Pinagkaguluhan ang sikat na aktor na ito sa Bora ng mga tao dahil sobra ang kagwapuhan kaya tinitilian ng mga tagahanga.

Kaso na-turn off ang mga ito nang makita siyang kasama ang dalawang aktres habang nag-iingay sa pamamasyal at dis oras pa naman ng gabi.

Sey ng mga naroon na nakakita sa kanila, parang sila lang ang tao at hindi na inalintana ang pambubulahaw sa mga tahimik na natutulog.

May mga nag-aakala na sobra ang kalasingan ng tatlo kaya walang pakialam sa paligid.