May cheese na ang spaghetti ngayon ni Pokwang

Maraming pagbabago sa buhay ni Pokwang mula nang mag-artista siya. Isa rito ay ang pagkakaro’n na ng chesse ng spaghetti na kinakain nila ngayon. "Dati wala," ang may bahid pagmamalaki niyang sabi.

Mayro’n pang isa. Pitong buwan na lamang at fully paid na ang kanyang van na kinuha niya ng hulugan at ginagamit niya sa kanyang trabaho.

Meron na rin siyang kulang-kulang sa isang ektaryang lupa sa Tanay. Wala pa siyang plano para dito dahil nag-iipon pa siya pero may mga punong namumunga ito na pinakikinabangan na niya. Sapat na muna sa kanya yung bahay na inuupahan niya sa Antipolo na kung saan ay nakatira rin ang kanyang ina, isang katulong, isang PA at ang kanyang anak.

"May maganda akong garden dito na siyang nagpapasaya sa akin at pinaggugugulan ko ng panahon kapag libre ako sa trabaho. Bukod syempre sa aking magsa-10 taong gulang na anak, si Reie Mae, na siyang nagsisilbing inspirasyon ko sa buhay. Sa kanya lamang at sa aking garden ay puno na ang buhay ko, hindi ko na kailangan ng lalaki," anang babae na hindi alam ang kahulugan ng salitang "pahinga".

Itinanggi ni Pokwang na mas malaki ang roles nila ni Eugene Domingo sa D’Lucky Ones kesa kina Sandara Park at Joseph Bitangcol.

"Mabait si Direk Wenn (Deramas), ginawa niyang magkakapareho ng importansya ng mga roles naming apat sa movie," paliwanag niya.

Second time na ito ni Pokwang na makasama si Sandara.

"Nung first time, sa Bcoz Of U, sila pa ni Hero (Angeles) ang magka-loveteam. Nun trabaho lang sila ni Hero. Pagkatapos ng eksena, hiwalay na sila, kanya-kanya nang text. Pero sila ni Joseph, ang hirap paghiwalayin. At kitang-kita ang sobrang saya ni Sandy dahil kasama niya ang kanyang mahal."

* * *

Ngayong Sabado, bibirit na naman ang pitong grand finalists ng Pinoy Pop Superstar na sina Harry, Gerald, Aicelle, Irra, Denver, Elise at Rosemarie sa kanilang Nationwide Roadshow sa Iloilo. May pagkakataon na ang mga fans na marinig sila at makasalamuha at makahingi ng kanilang autograph.

Available na rin for signing at buying ang "PPS Grand Contender’s Album" mula sa GMA Records na naglalaman ng bawat kanta ng grand contenders at ang minus ones nito. Kung sino man ang paborito n’yo ay pwede n’yong iboto. Mag-text ng PPS (space) Name ng contender at ipadala sa 2364 (Globe, TM, Sun) at 4627 (Smart/Talk N Txt).

* * *

E-mail: [email protected]