Dennis Trillo, susubukang mag-host

Sa pagbabalik ng Encantadia sa GMA-7, muli itong humataw sa taas ng ratings.

Patunay lang ang pagtutok ng sambayanang Pinoy sa Encantadia na siyang hiling ng mga tao, na obviously ay pinagbigyan naman ng GMA-7.

Siyempre balik din ang mga bidang Sang’gre na sina Iza Calzado, Diana Zubiri, Sunshine Dizon at Karylle. Kasama pa rin sina Dawn Zulueta, Dingdong Dantes at marami pang iba.

Ibinalik din si Jennylyn Mercado. Kaya marami ring fans ang nagtatanong kung ibabalik din ang role ni Mark Herras. Hindi lang bilang partner ni Jennylyn kundi dahil sa kasama rin si Mark sa original cast ng Encantadia.

Kaya abangan na natin ang mangyayari sa mas pinaganda pang Encantadia.

* * *

Nagbabalik din sa Kapuso Network si Jean Garcia sa palabas na Majika.

Matagal ding nawala sa GMA si Jean dahil naging mainstay siya sa mga programa ng ABS-CBN. Ngayong wala na siyang kompromiso sa Dos ay masaya naman siyang tinanggap ng GMA-7.

Ayon naman mismo kay Jean ay talaga namang original Kapuso siya dahil nagsimula siya sa That’s Entertainment at GMA Supershow.

* * *

Patuloy pa rin ang pagpalabas ng Pelikula at Lipunan na handog ng Mowelfund.

Noong nakaraang premiere night ay sampung artista ang ginawaran ng parangal pero ilan lang ang nakarating.

Dumalo sina Susan Roces, Delia Razon, Mitring David na kahit naka-wheel chair ay dumating pa rin sa okasyon. Pauwi na ako nang makasalubong ko si Amalia Fuentes na isa rin sa 10 artista na pinarangalan.

Nabigyan kami ng pagkakataon na mapanood ang mga pelikulang Darna, Dyesebel at iba pa. Nakapanghihinayang kung hindi n’yo mapanood ang mga magaganda at original nating pelikula na mahahagilap mo na lang sa ibang bansa.

* * *

Sa unang pagkakataon ay binigyan si Dennis Trillo ng hosting job at ito ay ang Binibining Pilipinas ‘06 na gaganapin sa Araneta Colisuem sa March 4.

Marami ang nagdududa sa kakayahan ni Dennis sa kanyang first hosting job at Binibining Pilipinas pa. Pero malaki ang tiwala sa kanya ng GMA-7 kung kaya isinama siya kina Dingdong Dantes, at Pia Guanio.

Malaking hamon ito para kay Dennis para patunayan ang isa pa niyang talino, at ito ay ang pagho-host.