Trip to Disneyland USA ang gustong regalo ni Yasmien sa kanyang debut

Eighteen y/o na si Yasmien Kurdi sa January 25 at dapat ay magde-debut siya pero, ayaw na niyang magkaro’n pa ng malaking party. Sa halip ay gusto niyang mamasyal sa Disneyland USA.

"Nakapunta na kasi ako sa Hongkong Disneyland courtesy of Forever Flawless. Wala akong ginawa kundi mamasyal at bumili ng mga Pooh items kung kaya pag-uwi ko ay napuno ko ang kwarto ko ng mga item ni Pooh. Gusto ko naman na sa birthday ko ay sa Disneyland USA naman ako pumunta. Sana wala akong trabaho para makaalis ako at sana, may magbigay sa akin ng regalong ito," wish ng magiging debutante.

Sa malas, hindi matutupad ang wish na ito ni Yasmien dahil may bago siyang series na sisimulan sa GMA7, ang ika-4th season ng Now & Forever na kung saan ay isang magandang role ng ginagampanan niya bilang anak nina Gary Estrada at Sheryl Cruz na maghihirap sa kamay nina Jennifer Sevilla at Ailyn Luna.

"Idinuldol nila ako dito sa toilet bowl. Mas grabe ito kesa nang iduldol ako sa lupa sa Love To Love. Pero okay lang, nilinis nilang mabuti ang toilet bowl bago namin ito ginamit," paliwanag ni Yasmien.

Kahit walang party masaya si Yasmien. Dumating recently ang limang kaibigan niya from Kuwait para dito na mamirmihan.

* * *

Palabas na sa January 11 ang The Beautiful Boxer, isang true story tungkol sa isang Thai boxer na nakipaglaban sa ring para makapag-ipon ng pera para makapag-paopera siya’t maging isang tunay na babae. Release ito sa atin ng Viva Entertainment.

Nood kayo at siguradong masisiyahan kayo’t makikisimpatiya sa naging buhay ng binabaeng Thai boxer.

* * *

Panoorin sa Linggo, Enero 8, ang Popstar Kids, QTV 11, na magkakaro’n ng kanilang weekly finals. Sino kaya kina Pocholo, Michelle at Reneelyn ang mapipili para humamon sa current champion na si Jolie?

Popstar Kids is hosted by Kyla na isa ring produkto ng singing contest. Alam niya kung anong hirap ang pinagdadaanan ng mga bata para lamang manalo. "At mas maswerte sila ngayon dahil mas malalaki ang premyo nila at mas malalaking opportunities ang naghihintay sa kanila once na manalo sila," sabi niya.