Bestfriend, bad influence sa aktres!

Ayon sa isang source, nalulungkot siya dahil baka hindi na magkabalikang muli ang kaibigang aktres at ang asawa nito na isa ring sikat na singer.

Komo hiwalay na ang bestfriend sa asawa nito ay malamang na natuturuan din ang kaibigang aktres para huwag nang makipag-reconcile sa kanya ring asawang singer at komedyante.

Sey nga ng aking source, hindi kaya bad influence ang best- friend ng aktres na ito?

Yoyoy, Paborito Ng Mga Balikbayan

Paborito ng aming pinsang balikbayan si Yoyoy Villame na aliw na aliw sila kapag nagpi-perform ito sa Amerika sa Filipino community dun. Swerte naman dahil nang dalhin ko siya para ipasyal sa Baywalk noong Lunes ng gabi ay narun ang komedyante kasama ang anak na si Hanna kung saan may gig show ito sa Indos Strip sa Baywalk sa Roxas Blvd. kasama ang Intensity Band na tumutugtog every Monday.

Tawa nang tawa ang aming pinsang balikbayan sa pagpapatawa nito at galing umawit ng mga novelty songs na kinompose niya.

Fully booked na ang mag-ama mula November 30 hanggang December 24 kung saan kabilang ang mga shows nila sa Kamaynilaan, Leyte, Toledo City at mabenta ngayon sa mga Christmas Party.

Sa kabilang banda, higit na maganda ngayon si Hanna dahil nadagdagan ng timbang na naka-concentrate din sa kanyang singing career.

Sapul nang mawala si Tess na ina niya ay lalong naging close ang mag-ama at dama namin kung gaano kamahal ni Yoyoy ang unica hija. Narito sa bansa ang bunsong anak ng singer-comedianne na si JR na nagsisilbing tsaperon at photographer ng mag-ama sa kanilang mga shows.

Pangarap Makatambal Si Piolo

Bago pumasok sa showbiz, modeling ang pinagkakaabalahan ni Mickie Joy Hyatt. Mainstay na ito ng Bora at may ibubuga naman sa pag-arte dahil nag-undergo ito ng workshop sa ABS-CBN.

Kasama ng ibang seksing kababaihan ng Bora na sina Jaymee Joaquin at Joyce So, nakita sila sa mga pahina ng FHM Magazine kamakailan lang. May TV commercials si Mickie Joy Hyatt, ang Sunsilk at Camay.

Twenty one years old na si Mickie at pangarap na makatambal si Piolo Pascual.

Theo, May Ibubuga Sa Pagsayaw

Kung pambato si Mark Herras ng StarStruck ay panlaban naman ng Dos ang 14 anyos na Star Circle Questor na si Theo Bernados. Nakita ang galing nito sa pagsayaw nang mapabilang sa mga contenders ng Clash Room ng ASAP Fanatics. Tinanghal siyang second honor at di pwedeng maliitin dahil ang kanyang mga kalaban ay sina Joseph Bitangcol at Mico Aytona.

Dumating si Theo galing ng California na puno ng paniniwala sa kanyang puso na makakatulong sa kapwa. Nakita kasi ng kanyang mga kaibigan ang pagiging relihiyoso dahil matindi ang kanyang paninindigan sa Diyos. Palabiro ito at mapagpatawa kaya mahal ng mga kasamahang artista.