Sis, tinalo ng Homeboy!

Tinext kami ni Empress Schuck para ibalitang nominated siya for Best Actress category sa darating na PMPC Star Awards for TV na gaganapin sa December 4, Party Central, Mother Ignacia Q,C.

Masayang-masaya ang bagets dahil katunggali niya sa kaparehong kategorya ang mga malalaking artistang tulad nina Lorna Tolentino, Lotlot de Leon at iba pa.

Hindi naman siya umaasang mananalo dahil alam niyang magagaling ang mga pangalang nabanggit, masaya na raw siya dahil napansin ang acting ability niya.

Samantala, hindi alam marahil ng personal assistant ni Cindy Kurleto na may gaganap na young Cassiopea sa prequel ng Encantadia na Etheria dahil ang sabi niya noon ay hindi raw tumatanda ang character ni Cindy kaya’t siya pa rin ang gaganap sa Etheria.

Ipinaalam ni Empress na maraming beses na siyang nag-taping as young Cassiopea at laking pasalamat niya sa GMA 7 dahil sa magandang exposure na ibinigay sa kanya.

Tinanong namin kung ano ang project niya sa ABS-CBN dahil talent talaga siya nito as one of the members of Star Circle Batch 13, pero hindi na kami sinagot ng bagets, meaning wala!

* * *

And speaking of PMPC Star Awards for TV ay nasa ruling daw ng nabanggit na award giving body na everytime na mamimigay sila ng awards ay bawal silang dumalo sa anumang function/events ng mga TV networks most especially GMA 7 at ABS-CBN one week before and after the awards night.

Sa December 4 ang awards night at sa December 2 naman ang pa-Christmas party ng ABS-CBN sa entertainment press, meaning hindi dapat dumalo ang mga PMPC members sa nabanggit na okasyon para walang isyu.

Ang kaso, nabalitaan naming dadalo pala lahat ng taga-PMPC sa nabanggit na pa-party ng Dos, so sila rin ang gumawa ng rules at regulations nila, sila rin ang sisira, ganun ba ‘yun?

Di kaya dapat iurong na lang ng Dos ang scheduled party nila para ma-accommodate ang kanilang loyal friends na taga-PMPC to avoid any issues?

* * *

Sawa na ba ang viewers kina Jennylyn Mercado, Jake Cuenca, Alfred Vargas at Paolo Contis?

Kaya namin ito naitanong ay dahil hindi nag-rate ang guesting sa programang Sis last Friday para sa promo ng Season 9 ng Love to Love dahil nakakuha lang sila ng 8.9% kumpara sa Home Boy na nakakuha naman ng 10.6%.

Pawang malalaking artista ang guest ng Sis kumpara sa HB na mga Star Circle Quest kids at Pro-Gifted kids para sa selebrasyon ng National Week for the Gifted.

Ayon sa staff ng Siete ay nagulat sila dahil first time raw silang matalo kapag guest nila sina Jennylyn, Alfred at iba pa. – REGGEE BONOAN