Frenchie, pag-aagawan ng 2 manager?

Sino kaya kina Geleen Eugenio at Boy Abunda, Jr. ang bagong manager ng 2nd Grand Champion ng ABS-CBN’s Search for A Star In A Million na si Frenchie Dy?

Kaya namin ito naitanong ay dahil sa mensahe na nagpapatulong daw ang malusog na singer kay Geleen dahil binitiwan o iniwan na niya ang istasyong naka-diskubre sa kanya.

At dahil bilib naman daw ang dating manager ni JayR sa talent ni Frenchie ay pumayag daw itong maging manager ng huli at tutulungan pang makapasok sa SOP na katapat mismo ng ASAP 05.

Dagdag pa na nagpapatulong din daw si Geleen na isulat si Frenchie sa ilan niyang kakilalang entertainment writers para magkaroon naman ng publicity ang nabanggit na singer.

Medyo naguluhan/nalito kami dahil nung dalawin naman namin si Boy sa taping ng Home Boy last Thursday night ay nabanggit nga niya na imi-meet na niya si Frenchie at balak niyang baguhin ang image nito.

"I will meet her one of these days, kung baga, kakausapin ko na siya kung anong plano ko sa kanya kasi gusto ko siyang gawing Queen Latifah ng Pilipinas, ‘yung matabang singer sa States na sexy-sexy ang dating, gusto ko siyang maging ganun at nakausap ko na ang taga-ASAP at payag siya sa naisip ko, so Frenchie will be seen in ASAP soon," paliwanag ng mahusay na tv host at talent manager.

Ang partner in life ni Boy na si Bong Quintana muna pala ang humarap kay Frenchie para kilatisin at saka ihaharap kay Boy for final interview.

At ang say ni Boy, "Wala akong idea tungkol kay Geleen, I’ll ask Frenchie when we meet." — Reggee Bonoan