Sikat sa buong Asya!

Kung hindi siguro sumali at nanalo sa Star In A Million si Erik Santos disin sana’y isa na siyang dentista o di kaya nurse na ngayon.   

Nasa 4th year na siya ng dentistry nang mag-shift siya sa nursing pero bago pa man niya matapos ang kanyang nursing course ay inagaw na siya ng limelight nang siya’y  makipagsapalaran sa Star In A Million.

Although hindi natupad ang pangarap ni Erik na maging isang nurse o di kaya maging isang ganap na dentista, malaking ambag naman siya sa larangan ng libangan at musika.

* * *

Sa grand final’s night ng Indonesian Idol nung nakaraang Agosto 12, isa si Christian Bautista sa mga naging ispesyal na panauhin. Inawit niya sa nasabing okasyon ang kanyang hit song na "The Way You Look at Me" at ang "Bahasa Cinta" kasama ang mga babaeng finalists at naka-dueto rin niya ang Indonesian Idol grand winner na si Delon.   

Sikat na sikat sa Indonesia si Christian, ang kanyang album at mga pinasikat na awitin. Nakatakda niyang i-record sa Ingles sa Warner Music Indonesia ang dalawang Indonesian songs ng top Indonesian composer, musician at arranger na si Andi Rianto.  Ang kanyang album sa Warner Music Philippines ay umabot na sa platinum sa Indonesia na bumenta ng mahigit 75,000 copies.  Ni-repackaged din sa Indonesia ang kanyang album at kasama na rito ang newly-produced videos ng "Hands to Heaven" at "Colour Everywhere".   

May ongoing negotiation na rin sa isang telecom company sa Indonesia para sa mga ring tones at ring backs ng boses ni Christian at mga sikat na awitin nito. Ang album ni Christian ay nakatakda ring i-release sa iba pa nating mga kalapit-bansa tulad ng Thailand at Malaysia.

* * *

Isa na namang kaabang-abang at nakakatuwang episode ang matutunghayan ngayong gabi sa Bitoy’s Funniest Videos ng master of disguise na si Michael V. pagkatapos ng Pinoy Pop Superstar ni Regine Velasquez.   

Anong disguise na naman kaya ang gagawin ni Michael V. at sino naman kaya ang bagong niyang ‘biktima’?  Ang mga ito ay sasagutin sa top-rating program na Bitoy’s Funniest Videos kung saan palabas din ang tagalized America’s Funniest Videos na siya naming pinakapaboritong portion ng programa.

* * *

E-mail: [email protected]