Mark, Mike, parehong may speech defect

Mawawala na siguro ang tampo ni Tanya Garcia sa GMA-7 dahil may bago siyang show. Isasama siya kina Sunshine Dizon, Dennis Trillo, Polo Ravales at Christopher de Leon sa Season 3 ng Now & Forever na hindi pa namin alam ang title at ayaw sabihin sa amin ng aming source.

Sa September na ang start ng taping ng afternoon drama series na papalit sa Ganti. Excited nang bumalik sa trabaho si Tanya na matagal na ring nabakante mula nang magtapos ang Twin Hearts. Hindi kasi naipalabas ang ginawa niyang Noel at balita namin, sa Zoe Broadcasting Ch. 11 ito mag-i-air.

In fairness, hindi rin naman totally pinabayaan si Tanya dahil kahit walang regular show, naggi-guest siya sa iba’t ibang show ng network. Isinama rin siya sa 55th anniversary celebration ng Ch. 7 at isa siya sa mga rumampa sa red carpet.

Maganda ang role ni Tanya sa N&F at makikipag-sabayan siya ng acting sa kanyang co-stars. Si Mac Alejandre pa rin ang director nito.

* * *

Final title na nga ba ang Sa Piling Mo na balik-tambalan nina Judy Ann Santos at Piolo Pascual sa telebisyon? Si Sheryn Regis daw ang kakanta ng theme song ng teleserye at kasama sa second album nito sa Star Records na "What I Do Best" ang nasabing kanta na sinulat ni Marlone Silva.

Si Sheryn din ang kumanta ng theme song ng Kampanerang Kuba entitled "Sabihin Mo Sa Akin" at kundi kami nagkakamali’y, may kinanta na rin siyang movie theme song ng isang Star Cinema movie. Kapag nagpatuloy ang ganitong takbo sa career ni Sheryn, hindi magtatagal, siya na ang tatawaging Queen of TV and Movie Theme songs. Madadagdagan kung ganoon ang title niya dahil siya rin ang Pop Belter at The Crystal Voice of Asia.

Nasa album din ni Sheryn ang "Now That I Have You" na duet nila ni Erik Santos, "Hindi Ko Kayang Iwan Ka", "Dahil Nagmamahal" at ang version niya ng "I Don’t Want You To Go" at "When You Tell Me That You Love Me".

* * *

Enjoy kaming mag-lurk sa thread ng iba’t ibang fansite dahil natatawa na kami’y, nakakakuha pa ng balita.

Nagpatawa sa amin ang posted message ng isang GMA-7 viewers tungkol kina Mark Herras at Mike Tan. Bakit daw parehong may speech defect ang male Ultimate Survivors ng StarStruck 1 & 2? Kung si Mark, kinakain ang salita, si Mike nama’y monotone magsalita, as in, iisa ang tono ‘pag nagdi-deliver ng dialogue.

Ang suggestion ng viewer, magsabay sina Mark at Mike sa speech clinic na ibibigay ng GMA Artist Center kay Mark para maayos ang kanilang pagsasalita. Paging Ch. 7!

Maraming beses na naming na-interview ang dalawa’t, naiintindihan naman namin si Mark at okey ding kausap si Mike. Pero, maganda ang suggestion ng viewer huh! For that matter, isama na rin ng istasyon na mag-undergo ng speech clinic ang lahat ng young stars na contract stars nila para mag-improve ang speech skills.

* * *

Totoo palang hindi nakakahawak ng kanyang kinikita ang young actress na ito. Ang nakakaloka pa’y, hindi rin nito alam kung magkano ang talent fee niya ‘pag gumagawa ng pelikula, naggi-guest sa TV at personal appearances. Deretso sa mga magulang ang kanyang kinikita at obviously, malaki ang tiwala nito sa parents dahil hindi nga nagtatanong.

Pasaway ang mga reporter dahil sinulsulan ang young actress na alamin sa kanyang parents ang tinatanggap na bayad tuwing siya’y nagtatrabaho. Pero, smile lang angsagot nito na ang dating sa amin, hindi niya gagawin at pababayaang ang mga magulang ang makialam at humawak sa kanyang kinikita.