Rustom, magdi-direct sa ABS-CBN?

Dumalaw sa Solar-UIP office si Rustom Padilla para dumalo sa birthday celebration ni Nicole Castillo. Usap-usapan dun na may ididirek na TV show ang aktor sa Dos. Gaano kaya katotoo ito?

Kunsabagay talagang desidido ang aktor sa planong pagdidirek. Ipinagmamalaki naman nito na tapos siya ng filmmaking sa Amerika na gusto na niyang gamitin.

Kahit sa opisina ay nagtatalu-talo sila kung bakit pumayat nang husto ang aktor at iisa lang ang kanilang palagay. Hindi natanggap ng aktor ang kanilang paghihiwalay noon ng dating asawang si Carmina Villaroel.

Pilit Pinaghihiwalay

Nilinaw ni Jennylyn Mercado na hindi totoong naghiwalay na naman sila ni Mark Herras. Normal lang sa kanila ang galit-bati na nagpapatibay sa relasyon.

Natatawa nga ang aktres dahil hindi nila alam kung saan sila lulugar ng nobyo. Noon namang nag-split sila ay pilit silang pinagbabati at ngayong nagkabalikan na at nagkakasundo na ay pilit naman silang pinaghihiwalay.

Mas Dumami Ang Trabaho

Inamin ni Daniel Razon na mula nang umalis siya sa Unang Hirit ay lalo siyang naging busy dahil dumami ang kanyang trabaho. Sabi nga nito, "I do a lot of things, conceptualize and incorporate variations in my program Kaka In Action. May foundation din ako na tumtutulong sa pangkalusugan lalo na sa mga bata."

Dahil sa kanyang feeding program ay nakatulong sila sa malnourished children. Sa tulong ng Rotary Club at iba pang non-government organization ay nakapagbigay sila ng wheelchair at sa iba pang nangangailangan ng tulong.

Ang programa ni Daniel na Kaka In Action ay mapapanood sa UNTV araw-araw mula Lunes hanggang Biyernes ganap na 5:30-6:30PM.

Walang Tulugan Si Igan

Mabuti na lang at malakas ang resistensya ng aming kaibigang si Arnold Clavio. Halos wala na itong itinutulog dahil halos madaling araw nang natatapos ang kanyang news program na Saksi. Uuwi ito ng bahay ng mga ala-una at pagsapit ng alas tres ay gising na ito para sa Unang Hirit na nagsisimula ng 5:30AM. Kailangang nasa istudyo na ng mga alas cuatro y media. Pagkatapos ng Unang Hirit ay diretso na ito sa kanyang programa sa DZBB.

Abala pa rin ito sa kanyang IGAN Foundation na tumutulong sa mga kapuspalad bukod pa sa Emergency.

Magkakatotoo Lahat Dahil Sa Skeleton Key

Kaya mo bang buksan ang ipinagbabawal na pintuan ng mga patay? Sige, ilabas mo ang iyong tapang at bigyan-daan ang pinakamasamang bangungot sa iyong buhay. Magkakatotoo lahat ang iyong kinatatakutan sa bagong handog ng Paramount Pictures, ang The Skeleton Key. Bida ang Golden Globe Award winner at Academy Award nominee na si Kate Hudson (Almost Famous), ang pelikula ay tungkol sa isang kakaibang kwentong multo na sinulat ni Ehren Kruger (The Ring) at idinirihe ni Iain Softley (K-Pax).

Kabituin sina Gena Rowlands (The Notebook) at John Hurt (Harry Potter and the Sorcerer’s Stone), ang The Skeleton Key ay ipinamamahagi sa Pinas ng United International Pictures sa pamamagitan ng Solar Entertainment Corporation.