Movie nina Ara at Jom, hataw sa international festivals

Pahirapan pala ngayong bumili ng pirated DVDs sa Quiapo. Ang rason: sunud-sunod ang ginagawang raid ng Optical Media Board at tauhan ng PNP. Kaya nga nagre-reklamo ang ilang buyers sa Quiapo na wala raw silang mabilhan dahil sa mga raid. "Hirap ngang bumili, wala tuloy kaming mapanood sa bahay," say ng isang suki sa Quiapo last Sunday.

Good to hear this dahil kahit pala nanahimik si OMB Chairman Edu Manzano, may nangyayari naman pala. Tahimik siyang nagtatrabaho.

Lately kasi ay tahimik si Chairman Manzano. Kahit ang lovelife niya, hindi masyadong maingay.

* * *

Imbyerna ang mga ka-opisina kong nakapanood sa girl na nagpa-interview sa The Buzz last Sunday. Siya ang supposedly nanay ng anak ni Cogie Domingo. "Bakit ba kasi kailangan niya pang magpa-interview sa TV? Bakit hindi na lang sila mag-usap ni Cogie?" react ng isa kong officemate.

Actually, hindi lang naman siya ang nagtatanong tungkol dito. Marami. Sana nga lang ma-settle na lang nila ito.

Kaya lang, mukhang mas mature ang girl kesa kay Cogie.

* * *

Isa ang Minsan Pa starring Ara Mina and Jomari Yllana under MLR Films sa napili ng National Center For Culture and Arts (NCAA) sa anim na pelikulang magri-represent sa bansa para sa cultural exchange with Chinese goverment sa Beijing and Shanghai na gaganapin sa last week of September.

Kasama sa six films na napili ng NCAA ang Jose Rizal, Milan, Magnifico, Tanging Yaman and Crying Ladies.

Malaki ang lugi ng producer na si Atty. Jojie Alonso sa Minsan Pa dahil ang tagal nilang nag-shooting sa Cebu eh hindi naman masyadong kumita dahil ipinalabas ito no’ng time na nagkakagulo sina Ara at Jomari.

Pero reward na lang kay Atty. Jojie ang kabi-kabilang invitation from different international film festivals at ma-expose ang movie sa ibang bansa.

Vindication na rin siguro ito sa pelikula dahil last year, inisnab ito ng Metro Manila Film Festival.

* * *

Sayang at wala ang name ni Cesar Montano sa mga websites ng The Great Raid ng Miramax Films. Maganda pa naman daw ang exposure niya sa pelikula na showing sa August 12 worldwide.

Pero at least rubbing elbows siya sa mga Hollywood star nang magkaroon ito ng premiere night sa Washington DC last week.

Anyway, na-capture ng pelikula ang Cabanatuan nang mag-re-construct sila ng Cabanatuan Prisoner of War Camp sa Australia.

Hindi kasi sila nag-shooting dito dahil nang magso-shooting sila, may peace problem sa ating bansa kaya nag-decide na lang silang mag-reconstruct ng war camp sa Australia.

Sa August 5, magkakaroon ng presscon si Cesar para sa nasabing pelikula, ang kanyang first international movie.

* * *

Sayang at ang grupo ng Maldivas (Gie Kinis, Polo, Nikki and AJ) ang unang na-eliminate sa first ultimate reality based search comedy shown sa Klownz and Zirkoh. Actually, magaling silang apat kaya lang kinapos daw sila sa benta ng ticket.

Pero binigay naman nila ang best nila. Ang gagaling nilang mag-perform at very spontaneous. Sad nga lang talaga at natanggal sila.

Nag-effort kasi talaga sila para sa nasabing search. Kunsabagay, winner na nga siguro silang mako-consider dahil kasama sila sa 16 sing along masters na nag-participate eh yun pala, aabot sa 80 ang sing along masters ng mga comedy bars na pag-aari ni Allan K. and Lito Alejandrino.

Tatlong group na lang ang magko-compete para sa premyong P100,000 - FYI (Ador, Betty La Fea, Dax Martin and Mama Mia); D’Novas (Norman, Kim, Lovely and Osang) and Himitsu (Joel O, Al Arayata, Genki Ranz and Inday Garutay).

Bukod sa P100,000 na premyo, meron pang 2 weeks performance sa Japan and trip to Hong Kong ang mananalong grupo.