Darna, namatay

Maraming viewers ng GMA-7 telefantasya na Darna ang nagulat sa episode kagabi dahil namatay ang bidang Pinay superhero sa hangarin nitong iligtas ang napakaraming tao sa tiyak na kamatayan.Matatandaang hindi pa nanunumbalik ang lakas ni Darna (Angel Locsin) bunga ng sunud-sunod na pakikipaglaban sa Lipon ng Kadiliman, ang pinagsama-samang puwersa ng lahat ng mga makapangyarihang kalaban ni Darna sa pangunguna nina Braguda (Celia Rodriguez) at Valentina (Alessandra de Rossi). At kagabi nga, isinakripisyo ni Darna ang sariling buhay sa pamamagitan ng pagsalo ng isang higanteng bolang apoy na pinagtulungang palakihin ng mga kalaban at ibinato para patayin ang napakaraming tao.  Ito na nga ang naging huli at pinakamalaking sakripisyo ng Pinay superhero — ibinuwis nito ang sariling buhay para sa sangkatauhan. Ngayong patay na si Darna, tuluyan na nga kayang maghahari ang Lipon ng Kadiliman?  Sino na ang magiging tagapagligtas ng mga taong walang kalaban-laban? Simula pa lang ito ng mga hindi inaasahang sorpresa sa pagpapatuloy ng  Darna. Mas pinagandang kuwento at mas maaksyong mga pangyayari ang naghihintay gabi-gabi sa bawat episode ng inaabangang telefantasya — kaya kumapit ka na!