Inglisera ang anak ni FPJ

Napanood ba ninyo ang S-Files last Sunday, June 12? Nagkaroon ng exclusive interview ang guest host na si Lucy Torres-Gomez (suspended pa kasi ang husband niyang si Richard Gomez, at wala naman si Joey Marquez na nag-attend ng wedding anniversary ng kapatid na si Via Marquez-Hoffman sa States) at Peolo Bediones kay Lovi Poe, ang anak ng yumaong Fernando Poe Jr. Cross between her dad and mom (former actress Rowena Moran) ang beauty ni Lovi. Mahilig kumanta, sumayaw at umarte si Lovi, kaya hiningan siya nina Lucy at Paolo ng sample ng singing talent niya. Maganda ang boses ni Lovi, at sinabi niyang gumanap siyang Belle sa musical play na The Beauty and The Beast sa kanilang school. Hindi lamang nasagot ni Lovi ang tanong kung papasukin din ba niya ang showbiz. At kung buhay ba ang daddy niya, papayagan ba siya nitong mag-artista?

"If he’s alive, he will be furious.," nakangiting sagot ni Lovi.

Ang message niya sa kanyang ama: "Hi, Dad. I missed you so much. I know you’re guiding us. You’re a great father." At sa mga taong nagmamahal sa kanyang ama: "Thank you for your support."

Sabi ni Paolo, maraming nasa studio ang naiyak. Napansin lamang namin, hindi sumagot kahit minsan sa Tagalog si Lovi, kahit Tagalog ang question sa kanya nina Paolo at Lucy.

* * *

Sa Sunday, June 26 na pala ang pagbibigay ng taunang FAMAS awards, bale sila ang huling magbibigay ng award para sa mga mahuhusay na pelikula in 2004. Gaganapin ito sa Reception Hall ng PICC with a red carpet walk at 5:00 p.m. Ipapalabas sa Channel 2, iko-cover daw yon ng live ng The Buzz. Kasunod nito ay isang cocktail bago magsimula ang programa at 7:00 p.m.

Narito ang list of nominees:

Best Picture — Aishite Imasu (Mahal Kita) — BasFilms; All My Life — Star Cinema; Naglalayag — Angora Films; Panaghoy Sa Suba — CM Films; Milan — Star Cinema.

Best Director — Laurice Guillen (Santa Santita); Joel Lamangan (Aishite Imasu); Olivia Lamasan (Milan); Cesar Montano (Panaghoy Sa Suba); Maryo J. delos Reyes (Naglalayag).

Best Actress — Kris Aquino (Feng Shui); Claudine Barretto (Milan); Kristine Hermosa (All My Life); Angelica Panganiban (Santa-Santita); Judy Ann Santos (Sabel).

Best Actor - Jay Manalo (Aishite Imasu); Cesar Montano (Panaghoy Sa Suba); Aga Muhlach (All My Life); Piolo Pascual (Milan); Wendell Ramos (Sabel); Yul Servo (Naglalayag).

Best Supporting Actress — Aleck Bovick (Naglalayag); Sunshine Dizon (Sabel); Jean Garcia (Anak Ka Ng Tatay Mo); Angelu de Leon (Aishite Imasu); Ara Mina (Minsan Pa).

Best Supporting Actor — Ricky Davao (All My Life); Johnny Delgado (Santa-Santita); Jay Manalo (Mano Po 3); Albert Martinez (Anak Ka Ng Tatay Mo); Dennis Trillo (Aishite Imasu).

Si Cesar Montano ay muling na-nominate bilang Best Director and Best Actor sa Panaghoy Sa Suba. Maulit kaya ang panalo niya sa katatapos na Gawad Urian na pareho niyang napanalunan ang dalawang nominations niya?

Manalo naman kaya si Jay Manalo na nominated sa dalawang category, bilang Best Actor sa Aishite Imasu (Mahal Kita) ng BasFilms at bilang Best Supporting Actor sa Mano Po (My Love) ng MaQ Productions.

* * *

Kuwento ng friend naming kababalik pa lamang mula sa bakasyon niya sa States, na sa Seoul, Korea ang stop-over niya for four hours, nakapasyal daw siya sa airport at nakita niyang sikat na sikat pala talaga roon sina Choi Ji Woo (si Jodi sa Stairway To Heaven) at Kwang San Woo (si Cholo naman sa Stairway To Heaven), si Bae Yong Jung (si Jun sa Endless Love 2 (Winter Sonata) at si Song Hae Gyo (Jenny sa Endless Love (Autumn In My Heart) at si Jessie sa Full House) dahil ang lalaki ng mga posters na ibinebenta sa isang malaking store na pawang mga tapes ng mga Koreanovela ang ibinibenta roon. Marami rin daw mga souvenir items tungkol sa kanila at sa mga TV series nila ang mabibili roon.

Dagdag pa ng friend namin, nadadaanan din daw papuntang Seoul International Airport iyong bahay na ginamit nina Jessie at Justin (Rain Kim Sung Hoo) sa "Full House."