Sina Alessandra at Jeremy Marquez na! Paolo, interesado kay Jennylyn!

Kaya namin ito nasabi ay dahil nu’ng nalaman daw ni Paolo sa set ng Love to Love 7th season na hiwalay na si Jennylyn Mercado sa boyfriend nitong si Mark Herras ay nagsabi raw itong, "Talaga, hiwalay na sina Mark at Jennylyn? Mai-text nga si Jen..." at saka raw sinabayan ng magandang ngiti.

At sinita raw si Paolo ng staff ng programa ng, "Tumigil ka na Paolo, ha, namomroblema na nga kami sa dalawa, dadagdagan mo pa? Nakita mo ng walang gana mag-taping si Jennylyn?"

At sumagot naman daw ang actor ng, "Basta abangan n’yo, babalik ang sigla niya sa set."

Anyway, aminado ang staff na kausap namin na problemado nga sila dahil sa hiwalayang Mark at Jennylyn dahil hindi nga nagpapansinan ang dalawa at nakikita raw yon sa harap ng kamera. Hoping sila na magkaayos nga ang dalawa dahil maganda pa naman daw ang Love ko si Urok.

Pero itong si Paolo raw ay mukhang matindi talaga ang tama sa dalaga, susme, makigulo ba ang Hari ng Sablay? 

* * *

Nakilala na namin ang Amerikanong boyfriend ni Aiai delas Alas na si Art Carter sa bahay ng komedyana last Monday night kung saan nagpahanda ng dinner.

"Gusto ko kasing ipakilala si Papa Art sa mga anak ko, pamilya ko at closest friends ko at para mapintahan n’yo na rin kung okey ba," ito ang bungad sa amin ni Ms. A.

In fairness, hindi halatang 52 years old ang boyfriend ni Aiai dahil bukod sa baby face ito at malusog ay malakas pa. Kapansin-pansin din ang pagiging magalang ni Art dahil parati siyang tinatawag ng mga anak ng comedy concert queen para maglaro ng playstation at naringgan namin siyang nagsabing, "Please excuse me" at sabay bulong kay Aiai ng "Is it okey, I’m going with the kids, am I impolite?"

Boto ang mga kaibigan at pamilya ni Aiai kay Art at nagulat kami sa bulong na may halong lambing ng anak niyang si Sofia, "Mama, gusto ko si Tito Art maging tatay," na ikinagulat din ng bida ng My Juan and Only.

Paulit-ulit nang sinasabi ni Aiai noon pa na kapag nag-boyfriend siya, ang mga anak niya ang magsasabing ‘pasado o hindi’ sa kanila dahil sila ang dapat pakisamahan.

At para sa panganay na si Sancho ay two thumbs up ang ibinigay nito kay Art, ang pangalawang si Nicholo ay magandang ngiti dahil hindi pa raw siya natatalo sa playstation (dapat talunin siya para bumoto) at si Sofia raw ang pinakamahirap kunin ang loob kaya’t laking gulat dahil nagsabi na itong gusto niyang maging ama si Art.

Smart si Art dahil nu’ng sabihin sa kanya na gusto siyang maging ama ni Sofia ay, "Really, oh, I can’t replace their father, but I like her, that’s cool."

Samantala, kung mauuwi raw sa kasalan ang relasyong Art at Aiai ay sa Amerika sila magpapakasal.

"Sa Amerika na lang, kasi tahimik, dito baka maging circus, ayoko no’n at saka kung magkakaanak ako, doon ko gustong manganak para American citizen tapos i-uuwi ko rito. Dito ko siya papalakihin, mahirap dun kasi namamalo ako, baka ma—911 ako," nakangiting sabi ni Aiai.

Sa Edsa Shangrila Hotel naka-check in si Art habang narito siya sa Pilipinas dahil katwiran ni Aiai, "Sabi ko, bawal magsama sa iisang bahay kapag hindi pa kasal, Filipino culture ‘yun." Pero nu’ng nasa Amerika siya, sa bahay ni Art siya tumira at ang katwiran niya, "E, iba ang kultura nila syempre, pero hiwalay kami ng kwarto kasi kasama pa niya ang mama niya at gustung-gusto ako."

Tungkol sa computers ang negosyo ni Art sa Ventura, California kung saan may malaking shop siya at wala raw siyang kasosyo at say ng future Mrs. Art Carter, "Kung sa palakihan ng bahay, mas malaki bahay ko, pero mas mayaman siya kasi dollars ang pera niya. Nagulat nga siya nu’ng makita niya bahay ko, sabi niya, "Oh, you have a big house, cool." 

* * *

Gaano katotoo na mag-on na sina Jeremy Marquez at Alessandra de Rossi?

Ito ang tsika sa amin ng taga-Darna na hindi naman daw itinatago ng dalawa ang kanilang relasyon, hindi lang nila alam kung aaminin nila ito sa publiko.

"Di ba, type ni Jeremy ‘yung madaldal, kwela, may sense of humor at itong si Alex, mahilig sa pa-mysterious effect, kaya siguro nagkasundo sila.

"Sweet sila sa set at perfect pair naman sila para sa amin."

Well, parehong walang sabit ang dalawa kaya why not? – Reggee Bonoan