Actor, uminit ang ulo dahil sa bubble gum

Marami kaming nakakausap na hindi nila type ang role ni John Lloyd Cruz sa teleseryeng Ikaw Ang Lahat Sa Akin, pero mayroon namang gusto ang role ng binata. For a change daw naman, makita nilang hindi laging umiiyak si Lloydie. Kaya mukhang pangangatawan na ni Lloydie ang pagpapatawa niya nang tanggapin niya ang offer na mag-guest siya sa Bora. Gusto raw naman niyang maiba ang character niya.

* * *

Dapat pala, upon the invitation mula sa Puerto Princesa, sa June 15 and 16, doon gagawin ang All Star K Videoke Challenge at pupunta doon ang mga hosts na sina Allan K at Jaya, kasama ang mga contestants nila. A month ago pa ito tinanggap ng GMA Network, pero nag-back-out sila, pagkatapos ng nangyari sa broadcaster na si Reyster Langit at ang cameraman nito na parehong namatay dahil sa malaria.

Nag-iingat lamang ang GMA-7 para sa kapakanan ng kanilang mga talents.

* * *

Bumalik na muli si Joy Cancio, manager ng Sex Bomb sa Eat Bulaga, pero every Saturday lamang yon. Hindi pa kasi siya magaling na magaling, pero pwede na siyang magtrabaho, kaya kahit once a week lamang ay magtatrabaho na siya. Balitang may problema na naman si Joy sa isa sa kanyang miyembro. Kinausap na raw ni Joy nang masinsinan ang kanyang miyembro, ang ina at abogado nito at inilahad na niya ang kanyang term. Nasa kanila na kung tutuloy pa ring magtrabaho ang miyembro sa kanya.

* * *

Nagulat daw ang mga nanonood sa isang bar sa Malate noong isang gabi nang magwala ang isa sa mga customers doon. Napag-alaman naming isang actor pala ito at kasama ang girlfriend niyang actress naman. Kwento sa amin, nagpunta daw lamang sa CR ang guy, nang pagbalik niya sa kanyang upuan, may naupuan itong bubble gum. Galit na galit daw ang aktor at tinatanong ang mga kapwa niya customers kung sino sa kanila ang naglagay ng bubble gum. Nang wala raw umamin, bigla na lamang itong nagwala at saka lumabas ng bar, iniwanan nito ang kasamang ka-date na aktres. Hay, naku, umiral pa rin ang pagkamainitin ng ulo ng batang aktor.

* * *

Simula na ngayong hapon ang bagong Chinovela sa GMA 7, ang Señorita Mei Mei. Tampok dito si Joe Chen, ang Taiwanese actress na makakatambal din ni Richard Gutierrez sa bagong telefantasya nitong Sugo.

Katambal ni Joe sa Chinovela ang napapabalitang boyfriend niya, si Jason Hsu ng grupong 5566, pero idinidinay niya ito nang makausap siya sa taping ng Sugo. Basta ang sabi niya, abangan na raw lamang ng mga Pinoy ang bago niyang serye dahil ito na ang 4th time na magsasama sila ni Jason, pero dito raw lamang sila nagkatuluyan as sweethearts sa story. Iyon daw naunang tatlo, hindi raw naman si Jason ang katambal niya.