Buntis, pero araw-araw yumuyugyog sa TV ?

May binisita kaming thread ni Antoinette Taus sa isang fan site sa Internet. Nag-lurk kami’t nakibasa ng posted messages ng kanyang fans at fans nila ni Dingdong Dantes. Galit pa rin ang karamihan sa kanila kina Dingdong at Karylle at sa pag-amin ng dalawa sa kanilang relasyon.

May ilan ngang nasa denial stage at iniisip na para sa promo ng Encantadia ang kanilang pag-amin. Pero, kung makikita lang nila ang nakikita naming ikinikilos ng love birds, off-camera, maniniwala silang nagmamahalan ang dalawa. Sweet sila na hindi naman bulgar at hindi masasabing PDA o Public Display of Affection.

Bukod sa posted messages, may mga litrato nina Antoinette at Dingdong kaming nakita’t yung isa’y ikinagulat namin. Naghahalikan ang ex-lovers at talagang lips-to-lips as in. Saan kaya kuha ‘yun at kailan nangyari? Pareho silang nakaputi at parang nagsasayaw.

Ayaw naming tanungin si Dingdong tungkol dito’t baka sabihing makulit kami’t sinagot na niya ang isyung ito. Saka, the first time lumabas ang pictures nila ni Antoinette, hindi niya tiningnan kahit may copy ng tabloid sa venue kung saan namin sila nakita ni Karylle.

Mas masa-shock nga lang si Dingdong kapag nakita ang nadiskubre naming litrato. Wala lang kaming alam mag-copy paste at ibang kaek-ekan sa Net kaya, hindi namin makopya ang shocking picture.

* * *

Si Jopay Paguia ng Sexbomb agad ang naisip namin habang binabasa ang isang item tungkol diumano’y pagbubuntis ng isang dancer na daily napapanood sa isang sikat na TV show. Lahat nang sinulat na clue ng writer, si Jopay ang itinuturo at si Janno Gibbs naman ang sinasabing boyfriend nito.

Kung natatandaan namin, idinenay na ito ni Jopay sa Startalk at S Files pero, mukhang ayaw siyang tantanan ng tsismis. Gusto nga yata ng writer na awayin at sugurin ni Bing Loyzaga si Jopay. Ha-ha-ha!

Ang nakakatuwa lang sa tsikang ito, habang pinaghihinalaang buntis si Jopay, araw-araw pa rin siyang napapanood na sumasayaw sa Eat Bulaga. At hindi basta sayaw ang kanyang ginagawa kasama ang Sexbomb dahil talagang yumuyugyog ang buo niyang katawan. Naisip namin na kung talagang buntis siya, titigil na siya sa kasasayaw. Hindi ba?

* * *

Ngayong Linggo na, pagkatapos ng S Files ang pilot episode ng Bubble Gang Jr., ang newest kiddie gag show ng GMA-7. Alam ni director Uro dela Cruz at staff ng show na maikukumpara ito sa Goin’ Bulilit ng ABS-CBN kaya, kanilang ginalingan. But of course, ang viewers pa rin ang magdi-decide kung aling show ang mas maganda at dapat subaybayan tuwing Linggo.

* * *

Mapapanood sa A.S.A.P. this Sunday ang third treat ng 13th anniversary ng ABS-CBN Star Magic. Kalulugdan ng viewers ang reunion ng cast ng Tabing Ilog na ilang taon ding sinubaybayan.

May special number sina John Lloyd Cruz, Kaye Abad, Patrick Garcia, Jodi Sta. Maria, Baron Geisler at Desiree del Valle. Sneak preview lang daw ito sa big happening at engrandeng selebrasyon na mangyayari sa May 29.

Naalala namin, hindi ba kasama sa Tabing Ilog si Paolo Contis? Bakit hindi siya kasama sa reunion? Ayaw ba ni Desiree o dahil lumalabas sa GMA-7 ang actor?

* * *

Disappointed ang friend naming number one fan ng singer na produkto ng isang singing talent search. Nagiging habit daw ng singer ang pumiyok at ma-off key sa mga performances nito ngayon. Ilang beses nang narinig at napanood ng friend naming kumanta ang kanyang favorite at iisa ang inirereklamo nito. Hindi na raw ito kasing-galing noong unang madiskubre.