John, namasyal lang sa GMA

Tapos na ang pamamasyal ni John Prats sa GMA7 na kung saan ay ilang ulit siyang napanood sa programang Daddy Di Do Du na nagde-deliver ng pizza sa bahay nina Maxene Magalona. Marami tuloy ang nag-isip na baka lilipat na siya ng istasyon. Pero, hindi pala, namasyal lamang siya! Ngayon, balik siya sa orihinal niyang bahay sa ABS-CBN na kung saan ay inalagaan siya ng may 13 taon. Bukod sa napapanood siya ng regular sa ASAP Fanatic ay judge pa rin siya sa Star Dance. "Ayaw ko nang maging judge, mahirap panindigan. Mahina ang loob ko," sabi niya nang makausap ko siya sa presscon ng Playboy Kuba ng Regal Entertainment na kung saan ay magkapareha silang muli ni Maxene.

Isa itong fantasy movie na kung saan ay kinulam siya ng ina ni Maxene dahilan sa pagiging tsikboy niya at naging kuba. Makakaalis lamang siya rito kapag nakakita siya ng isang tunay na pag-ibig. O di ba familiar?

Mayro’n din siyang isang sitcom na nakatakdang simulan kasama sina Aiai delas Alas, Randy Santiago at Vhong Navarro.

May July playdate ang movie.

March of next year ay tutungo ng US si John para kumuha ng course sa filmmaking sa New York University. Tatlong buwan lamang ito tatagal.

"Pangarap ko ring makapag-direct ng short film at MTV and eventually a film balang araw," aniya.

Ayon naman kay Maxene, matagal na silang magkaibigan ni John, sa Ang TV pa. "Kaya walang problema sa aming dalawa. Naging closer nga kami while shooting Playboy Kuba dahil sa Tanay, walang signal kaya kaming dalawa ang madalas na magkausap," sabi nito.

* * *

Napakasayang malaman na hindi natuloy ang balak ni Stella Ruiz na mamalagi ng US at kalimutan na ang pag-aartista niya’t pagkanta. Napakarami niyang talento na masasayang kung sakali man. At magaling siyang kumanta. Hindi nga lamang siya nabigyan ng mga magagandang breaks na ipinagtataka rin niya dahil hindi naman siya mahirap kausapin at imbitahin. Magaling din siyang tumugtog ng gitara na isang magandang kumbinasyon at pambihirang makita sa local showbiz. Maraming kumakanta at naggigitara at the same time pero, si Stella lang ang sexy.

Nasa bansa muli si Stella at binabalikan ang kanyang pagkanta. Tinanggal na niya ang kanyang apelyido bilang screen name. Sa pagbabalik niya, bitbit niya ang isang awitin na nirecord niya sa US, isang ballad na pinamagatang "It’s Not Easy To Let Go", isang komposisyon ni Saverio Principini, gumawa rin ng kanta para kina Avril Lavigne at Hilary Duff. Tumulong din sa recording si Michael Tacci, ang sound engineer ng bandang Metallica.

Habang nagaganap ito sa US, may tinanggap na tawag ang road manager ni Stella mula sa Galaxy Records, sister company ng Universal Records para sabihin na ang isang kanta na ini-record ni Stella para sa kanila maraming taon na ang nakakaraan ay ginawang carrier single ng isang bagong album na inilabas nila. Ito ang "Cry Over You" at nakatakdang lumabas ang album na ito sa buwang ito.

At parang nagsisimula na ang swerte ni Stella dahil next month, sisimulan na nila ni Archie Castillo ang kanyang solo album at makakasama rito ang awitin ni Principini. Nakatakda ring magkaro’n ng campus tour, mall tour, radio at bar tour si Stella. Excited siya dahil kung kelan siya nag-decide na mag-quit, saka naman nagiging maganda ang takbo ng kanyang singing career.