‘Magpo-produce uli ako’

Malapit na nating malaman kung sino sa mga 24 candidates ng Binibining Pilipinas ‘05 ang magsusuot ng tatlong korona para sa tatlong major titles na naghihintay. Ito’y gaganapin sa March 19 sa Araneta Coliseum.

Ito bale ang ika-42th taon ng Bb. Pilipinas na walong taon na ring ipinalalabas sa GMA 7 Network.

* * *

Lilipad na si Darna na muling bubuhayin sa katauhan ni Angel Locsin. Marami rin tuloy ang sumusubok na batang babae dahil sa paghahangad ding lumipad bilang Narda o batang Darna.

Wala pa mang napipili pero tiyak na marami na namang nanay at bata ang iiyak dahil isa lang naman ang mapipili.

Kung alam n’yo lang ang hirap na dinanas ng production staff ng Darna para lang makakalap ng impormasyon mula sa lahat ng gumanap ng Darna maging sa komiks at pelikula.

Kaya lipad Darna lipad na siyang muli nating tatangkilikin sa makabagong panahon.

* * *

Gaano naman katotoo ang balitang sila Angel at Oyo Boy Sotto na nga ngayon? Mukhang ipapagpatuloy ni Oyo Boy ang romansa ni Miko Sotto kay Angel.

Pero siyempre may nababasa tayong pagdi-deny pero ang katotohanan ay nasa kanilang dalawa lamang.

Sana naman kung talagang totoo ngang sila na, aba eh dapat kailangang mahalin ni Oyo Boy si Angel dahil magagalit sa kanya ang pinsan at bestfriend niyang si Miko.

* * *

Muli ay magpo-produce ako at ito ay pangungunahan nila Pilita Corrales at John Joven na gaganapin sa April 22 sa Club Mwah!

Si John ay isa sa lead actor ng Miss Saigon na magugustuhan n’yo ang pambihira niyang boses. Bukod sa dalawang nabanggit ay marami pang special guest ang nasabing show.

At kung hindi pa kayo nakakapunta sa Club Mwah, aba ay dayuhin n’yo ang lugar na ito dahil tiyak na hindi kayo magsisisi. Oras na pumunta kayo, para na rin kayong nakapunta ng Las Vegas dahil sa ganda ng venue na matatagpuan sa may Mandaluyong!

Ngayon palang ay pwede na kayong magpa-reserve ng tickets lalo na ang mga pami-pamilya na gustong mag-enjoy ng palabas.

Isa namang Mother’s Day presentation ang ihahandog nina ZsaZsa Padilla at Karylle sa May 7, 2005 na gagawin sa Music Museum.

Eh siyempre kung nandyan si Karylle, hindi maiaalis na hindi nila itanong sa akin kung kasama ba raw si Dingdong Dantes sa show.

Kaya ngayon palang ay nagpasabi na ako kay Dingdong para sa special show na ito para hindi mabitin ang mga followers nila. Di ba kailangang nandoon siya?

Sana po ay tangkilikin n’yo ang dalawang ipo-produce ng inyong Kuya Germs sa April 21 at May 7. Magkita-kita at mag-enjoy tayo sa mga special shows na para sa inyo.