Billboard ni Juliana sa EDSA,ini-intriga

Gaano kaya katotoo ang balitang nakarating sa amin na ipinatatanggal diumano ng MMDA ang nagkalat na mga billboards ng sexy star-turned TV host na si Juliana Palermo sa kahabaan ng EDSA na may kinalaman sa kanyang sexy at controversial TV program na Secrets na napapanood sa ABC-5 tuwing Martes ng gabi?  Dahil sa mga sexy poster-billboards ni Juliana, nakaka-distract umano ito sa daloy ng trapiko along EDSA at baka maging cause pa umano ito ng aksidente.   Pero wala umanong balak ang ABC-5 (producer ng show ni Juliana) na tanggalin ang mga sexy banners ni Juliana sa EDSA dahil hindi naman umano ito malaswa lalupa’t kuha ito ng magaling na photographer na si Xander Angeles.

Samantala, natutuwa kami para kay JM Rodriguez dahil meron na itong sariling TV program ngayon sa ABC-5 na pinamagatang Three Blind Dates na napapanood din tuwing Martes, 7:00 NG. Isa itong dating show na kakaiba ang presentation. Si JM ay hindi lamang isang mahusay na TV host kundi isa ring magaling na mang-aawit.

* * *

Ang kauna-unahang Golden Screen (Entertainment TV) Awards ng ENPRESS o Entertainment Press Society, Inc. ay gaganapin sa AFP Theater sa darating na September 25 (Sabado) sa ganap na ika-7 ng gabi na ihu-host ng Concert King na si Martin Nievera na siya ring magbubukas ng programa sa pamamagitan ng isang powerful song number. Ang Golden Screen (Entertainment TV) Awards ay magbibigay pugay sa pagkakatuklas ng telebisyon.  Ang tema ng gabi ay Celebriting the 77th Year of Television in the World. Ang comedy king na si Dolphy ang siyang magiging Trivia host na may kinalaman sa telebisyon. Dalawampu’t walo ang mga major awards na ipamimigay bukod pa sa dalawang special awards, ang The Helen Vela Lifetime Achievement Award at ang Special Citation for TV News Coverage. Ang Helen Vela Lifetime Achievement Award ay ibibigay sa tatlong personalidad na nakagawa ng marka sa iba’t ibang fields ng telebisyon at ang mga ito ay sina Nora Aunor (drama), Harry Gasser (news broadcasting) at Joey de Leon (comedy). Hindi naman magkakatampuhan ang dalawang higanteng TV networks, ang ABS-CBN at GMA-7 dahil pareho silang tatanggap ng special citation dahil sa kanilang walang takot na pag-cover sa 2004 May Elections at ang pagkakabihag sa Iraq ni Angelo de la Cruz.

* * *

Aminado si Dino Guevarra na malaking factor ang kanyang pagkakapanalo sa 30 Days dahil nabigyan ng panibagong sigla ang kanyang career na apat na taon ding nanahimik.  Bukod sa kanyang P300,000 cash prize, may build-up contract siya ngayon sa GMA at may tatlo na siyang regular programs kaagad, ang SOP, Joyride at ang bagong magsisimulang sitcom, ang Bahay Mo Ba‘To? at may isa pang upcoming." Ang buong akala ko noon ay tuloy-tuloy na pagiging inactive ko sa showbiz dahil wala talagang mga projects na dumarating kaya nag-concentrate na lamang ako sa buy-and-sell ng mga sasakyan para mabuhay ko ang aking pamilya," kwento niya.

Si Dino ay dating miyembro ng Abstract Dancers na pinagmulan din nina Dingdong Dantes at Sherwin Ordonez at naging contract star din siya ng Viva Films.

Sa edad na 19 ay naging ama si Dino ng dalawang batang lalaki sa kanyang dating non-showbiz girlfriend. Ang kanyang panganay na anak na si Ethan Brian Ross (5) ay nasa pangangalaga nila ng misis niyang si Kim de los Santos habang ang pangalawa at bunso niyang anak na si Miguel Ross (4) ay nasa ina naman nito.

Pitong taon na ring nagsasama bilang mag-asawa sina Dino at Kim pero nung July 10, 2002 lamang sila nagpakasal.  Pero hanggang ngayon ay hindi pa rin sila nagkakaanak dahil may thyroid si Kim at ito rin ang dahilan sa patuloy na pagtaba ng huli.  Pero determinado si Kim na pumayat kaya panay umano ang paggi-gym nito.