Pops, gusto nang bumalik sa ABS-CBN

Gusto ng concert queen na si Pops Fernandez na magkasama sila sa isang musical show ng ex hubby niyang si Martin Nieverra.

Samantala tapos na ang Twin Hearts na tinampukan ng actress-singer at malapit na ring magtapos ang sitcom na All Together Now kaya maraming nagtatanong kung babalik na ito sa Dos.

Sinabi nito na gustong-gusto niyang lumabas sa telebisyon at kung wala pa siyang offer sa GMA ay willing siyang magtrabaho sa Dos o kahit pa sa ABC 5. Per show pala ang naging kontrata nito sa Syete. May alok naman kay Pops sa GMA 7 gaya ng SOP bilang pansamantalang kapalit ni Regine Velasquez habang nasa abroad ito at paghu-host sa Startalk bilang kapalit ni Rosanna Roces. Kaso ang problema ni Pops ay marami siyang nakalinyang shows sa abroad gaya ng sa Japan sa buwang ito. May series of shows din ito sa Singapore gayundin ang provincial shows. Sa October pa ito pwedeng lumabas sa telebisyon kaya hindi rin pwede.

Kumusta naman sila ni Brad Turvey? Ayon sa aktres ay nanatili pa rin silang mabuting magkaibigan dahil may komunikasyon pa rin sila kahit break na sila.

Nag-Iisip Ng Ibang Pagkakakitaan Ang Mga St Stars

Ngayong bawal na sa SM ang pagpapalabas ng bold o sexy films ay saan na kaya pupulutin ang mga sexy stars? Malamang na tamarin nang magprodyus ang mga independent producers dahil iilan na lang ang sinehan na pwedeng paglabasan ng kanilang mga pelikula. Kung ganito ang mangyayari ay mawawalan na ng trabaho ang mga sexy stars at baka ang iba’y bumalik na lang sa pagiging GRO.

May ilan namang mga sexy stars na mautak-kundi man nag-aaral ay nagpoprodyus na lang ng show. Kabilang sa mga ito si Czarina Polman na patuloy na nag-aaral sa Thames at kumukuha ng International Studies. Sina Tracy Torres at Rose Valencia ay nagpoprodyus naman ng mga sexy shows. May negosyo ring iba si Tracy na nauukol sa mga accessories.

Francine, Mabuting Anak

Nagtataka si Francine Prieto kung bakit nadawit ang pangalan niya sa pagiging escort girl. Namis-interpret lang daw siya ng isang reporter nang tanungin siya kung nakaranas na siyang maging escort.

Naniniwala kami dahil kahit noong Ana Marie Falcon pa ito ay malapit sila ng kanyang ina na laging kasa-kasama nito at wala kaming narinig na negatibong balita tungkol dito.

Sa halip ay naging mabuti itong anak at kapatid at nagsilbing breadwinner ng pamilya lalo na ng mamatay ang kanyang stepfather.

Dennis, Natensyon Kay Jay

Hirap talaga si Dennis Trillo na gampanan ang role ni Erlinda Marikit sa pelikulang Aishete Imashu 1941 kung saan inahit nito ang buhok sa ibang parte ng katawan para magmukhang babae.

May eksena rito na makikipaghalikan siya kay Jay Manalo kaya natensyon ito nang husto. "First time ko itong ginawa kaya hindi maiwasan na talagang mailang ako habang kahalikan ko si Jay. Inihanda ko na ang sarili ko noon pa man nang malamang may kissing scene ako sa kapwa ko lalaki pero nang nasa actual shooting na kami ay talagang kinabahan ako nang husto," aniya.

Okay lang kay Dennis na second choice lang siya dahil nagpapasalamat pa nga siya sa magandang break na ito lalo na at ang hinahangaang si Joel Lamangan pa ang kanilang director.

Wala siyang inaaming relasyon sa pagitan nila ni Angel Locsin pero sinabing lalo silang naging close ngayon.

Kilalang-kilala na ang aktor ngayon dahil kahit saan siya magpunta ay ‘Gabriel’ ang tawag sa kanya na karakter nito sa Mulawin. Natutuwa ang aktor dahil pinapanood pala siya ng mga tao.

Aktor May Bad Breath

Galit na galit ang isang sexy actor dahil nang makasama nito sa isang pelikula ang isang sexy actress kung saan nagkaroon sila ng kissing scenes ay ipinamalita nitong mabaho ang kanyang hininga.

Ayon sa aktor, pinaghandaan naman niya ang kissing scenes dahil nagsepilyo siyang mabuti at ilang beses na nagmumog ng Listerine.

Ang ipinangangamba ng sexy actor ay baka walang leading lady na pumayag na makipaghalikan sa kanya dahil sa tsismis ng kapareha. Ngayon lang ito nangyari sa aktor at naintriga ito dahil sa pagiging tsismosa ng aktres.