Babae ang ikatlong anak ni Sharon!

Nanganak na ang Megastar na si Sharon Cuneta. Nagsilang siya ng isang sanggol na babae noong Huwebes, September 2 sa ganap na 6:30 ng umaga.

Ang bata na tumitimbang ng 8.2 pounds at may habang 51centimeters ay pinangalanan nilang Mariel Daniella Sophia.

Malusog naman ang anak ng Megastar, walang problema sa kanya, fully recovered na matapos ang ilang oras ng pamamahinga, pero ang bilin ng kanyang doktor, no visitors muna ng ilang araw.

Ingat din naman sila dahil kilala nila si Mega, basta may mga bisita ’yan hindi na naman ’yan matitigil sa kakukwento, at hindi maganda ’yon sa mga bagong panganak dahil maaaring kabagan siya o kaya naman ay mapwersa siya matapos ang hirap sa panganganak.

Kaya itong mga susunod na mga araw, wala na munang bisita ang Megastar.

Pero sabi nga nila matapos lamang ang ilang araw, kung ok na ok na siya talaga ay tatanggap naman sila ng mga bisita, pwede bang hindi eh gustung-gusto namang ipagmalaki ni Sharon ang kanyang bunsong anak na kung sabihin nga ng mga nakakita na ay isang napakagandang bata. – EDL