Young actor,nagbibilang ng anak sa iba't ibang babae

Masamang-masama ang loob ng sexy actor na si Dante Balboa sa lumabas na balita na isa umano siyang pekeng professor ng Far Eastern University.  Lingid kasi sa kaalaman ng marami, bukod sa pag-aartista at pagmu-modelo ni Dante, isa siyang professor sa FEU - Fairview kung saan siya nagtuturo ng Philosophy at Pilipino 1 & 2 na tatlong semester na niyang ginagawa. Bukod sa pagtuturo, tinatapos din niya sa UP ang kanyang Philosophy course at pagkatapos nito ay itutuloy niya sa kanyang pagkuha ng Master’s. Six units na lamang ang kulang niya kaya next sem ay magi-enrol na siya sa kanyang Master’s degree.

"Nakakasama ng loob ‘yung mga nagsusulat nang walang basehan. Kahit kelan ay hindi naman ako nagyabang tungkol sa aking credentials pero ‘yung sabihin na isa akong pekeng professor, nakakasira naman ‘yon sa aking pagkatao lalo pa’t pinaghirapan ko rin naman ang aking pag-aaral bago ako natanggap sa aking  pagtuturo," malungkot niyang pahayag.

Si Dante ay Elmer Anisco sa tunay na buhay at bunso sa anim na magkakapatid. Sa kanilang anim, tanging si Dante na lamang ang wala pang asawa pero hindi nito ikinakaila sa amin na meron na siyang non-showbiz girlfriend.

Taong 1998 nang siya’y tanghaling Mr. Young Philippines na siyang naging daan para siya’y kontratahin ng Viva Films. Pero isang pelikula lamang ang kanyang sinalihan sa Viva, ang Doctor X On The Air na pinagbidahan ni Leo Martinez. Since hindi pa siya handa nung mga panahon na ‘yon na magpa-sexy, pinagtuunan niya ng pansin ang kanyang pag-aaral at ramp modeling.

Nung 1999, kinontrata naman siya ng Seiko Films at agad ipinakilala sa pelikulang Kasiping. May bago siyang movie ngayon, ang sexy-drama movie na Karelasyon na dinirek ni Buboy Tan sa ilalim ng ATB-4 at kasalukuyan naman niyang tinatapos ang Temtasyon na pinamamahalaan ni Francis ‘Jun’ Posadas para sa Sacramento Films. 

Hindi ba naman nakakatanggap si Dante ng pangangantiyaw mula sa kanyang co-faculties at estudyante sa school?

"Hindi naman. Katunayan, minsan, ang mga estudyante ko pa nga ang nagbibigay sa akin ng press clippings kapag sila ang nakakakita ng publicity ko.  Sa school kasi, iba roon ang personality ko. Hindi ako si Dante Balboa,  ‘yung sexy actor na napapanood nila sa pelikula," paliwanag niya.

* * *

Tiyak na magtatagisan ng kakisigan ang Viva Hot Men at ang Masculados ngayong Sabado ng gabi sa Celebrity Turns kung saan ang talented singer-comedian na si Michael V. bilang si Junie Lee ang main host habang sina Randy Santiago at Toni Gonzaga naman ang guest co-hosts niya.  Nasa hot seat naman ni Junie Lee ang veteran award-winning actor-director na si Eddie Garcia at hindi rin makakaligtas kay Junie Lee ang musical director na si Gerard Salonga, ang nakababatang kapatid ng international star na si Lea Salonga.  

* * *

Hindi man nagtagal ang daily afternoon reality-based program hosted by Rica Peralejo at Marvin Agustin, muli naman silang binigyan ng ABS-CBN ng  panibagong show, ang EK Channel na napapanood tuwing Sabado ng hapon pagkatapos ng MTB: Ang Saya-Saya. Dito ay kasama nina Rica at Marvin sina Dominic Ochoa at Angelika dela Cruz. Ang EK Channel ay katapat na programa ng long running show na Startalk ng GMA-7 kung saan at odds ngayon ang dalawa sa tatlong hosts na sina Manay Lolit Solis at Rosanna Roces.

Speaking of Rosanna Roces, napapabalitang lilipat umano ito ng ABS-CBN para makasama sa EK Channel dahil malabo na siyang bumalik ng Startalk dahil sa away nila ng kanyang dating manager na si Manay Lolit.   

May nagsabi sa amin na tiyak na maiipit si Osang sa kanyang kontrata sa GMA dahil hanggang sa isang taon pa ang validity nito maliban na lamang kung kusa siyang ire-release ng GMA.

* * *

Kahit kelan ay hindi umamin ang sikat na young actor na ito sa kanyang nakaka-relasyon at lalong hindi ito aamin na mayroon siyang mga anak sa iba’t ibang babae. Isang source ang nagbalita sa amin na bukod sa dalawang napapabalitang anak na lalaki ng aktor sa dalawang magkaibang babae, meron pa umano itong anak na babae about 7 or 8 years old sa isang pamangkin ng isang Metro Manila mayor.

Naghahangad umano ang ina ng bata na sana’y kilalanin ng ama ang kanyang anak. Tulad ng ibang mga anak ng aktor, kamukhang-kamukha rin umano ng ama ang kanyang anak na babae. Maswerte pa rin ang young actor na ito at hindi pa nagpapa-interview sa media ang mga babaeng kanyang naanakan. Pero walang lihim na hindi nabubunyag.  Siguro tuma-timing lamang ang ina ng bata at tiyak na dudulog din ito sa media para humingi ng tulong.

* * *

<[email protected]>