GMA tinapatan ng Chinovela si Piolo

Abangan ngayong araw, Biyernes May 21 kung ano ang kahihinatnan ng meeting ng magulang ni Charee Pineda, ang trese anyos na batang tinalakan ni Direk Ruel Bayani sa set ng Ikaw Sa Puso Ko kay Ms. Malou Choa Fagar, ng TAPE Inc. na producer ng naturang soap drama.

Umaasa ang magulang ni Charee na maayos ang problemang ito para hindi raw umabot na sa korte dahil balak maghain ng reklamo ang magulang ng bata sa pangha-harass na ginawa ng naturang direktor.

Samantala, nakatakdang dalhin din ng magulang si Charee sa isang child psychologist dahil napansin nilang hindi na ito tulad ng dating masayahin, palangiti at palakwento, naging tulala, umiiyak at matatakutin na ngayon ang bagets.

Ayaw na ayaw na raw niyang (Charee) naririnig ang mga salitang "idiota" na siyang binanggit ni Direk Ruel sa kanya.

Awang-awa naman ang magulang ng bata dahil sa mga nangyari na kung sila lang daw ang masusunod ay ayaw nilang mag-artista ang anak, hilig lang talaga ito ng kanilang anak.

* * *

Simula sa Lunes, May 24 ay hindi na ang StarStruck Playhouse ang makakatapat ng Mangarap Ka ni Piolo Pascual kundi ang Endless Love 3 na isang chinovela uli.

Naurong na ang timeslot ng StarStruck Playhouse at hindi na ito tatanggalin tulad nang una naming naisulat, ang Stage 1, Live episode lang daw ang tsugi.

Samantala, nakatunog ang Dos na hindi na mawawala ang team drama ng StarStruck kaya’t tatapatan din daw nila ito ng grupo naman ng Star Circle Quest mula naman sa direksyon ni Bb. Joyce Bernal.

Tatapusin lang daw ang finals ng SOP at tulad din ng StarStruck, pagsasama-samahin din ang mga finalist.

Mukhang sasamantalahin ng ABS CBN Talent Center at Star Cinema ang relasyong Kristine Hermosa at Diether Ocampo dahil may bagong movie project ang dalawa na ang working title ay Rigodon.

Makakasama nina Diet at Tintin sina John Lloyd Cruz, Bea Alonzo at Dominic Ochoa na as of now ay hindi pa namin nakuha kung sino ang direktor.

Naaliw lang kami sa titulong Rigodon dahil bagay kina Diet at Tin dahil si Jericho Rosales muna ang boyfriend ng dalaga bago si Diether Ocampo. — Reggee Bonoan