Man'ong ipalabas na ang movie ni Jolina!

Naaawa naman kami kay Jolina Magdangal. Inilagay na naman sa mga malls iyong poster ng kanyang pelikula. Iyong mga nakita naming may masking tape na at nasira na siguro sa kakakabit at katatanggal. Hindi kasi mailabas iyan dahil naghahanap daw ng magandang playdate.

Palagay naman namin kahit na ano pa ang kasabay niyang pelikula kung talagang panonoorin siya ng mga tao at marami siyang fans, kikita rin iyan. Kung hindi naman, kahit na wala siyang kasabay flop pa rin iyan.

Dapat siguro ilabas na nila iyan dahil habang ganyan iyan, parang espadang nakabitin sa kanilang tuktok ang pelikulang iyan. Palagay namin, hindi naman maiiba ang resulta niyan sa takilya, may kasabay man o wala.

* * *

Sino ba naman iyang si Bernadette Sembrano bago siya binigyan ng build up ng GMA 7. Oo nga at isa siya sa mga reporters ng Probe Team, pero alam naman natin na ang show na iyan ay identified kay Che Che Lazaro. Kahit na sabihin mong may ibang mga reporters diyan, kay Che Che pa rin iyan.

Nagkaroon lang ng pangalan talagang masasabing kanya iyang si Bernadette noong gawin siyang host ng Wish Ko Lang, na tumaas naman ang ratings. Tinapatan iyan nang mga shows na ginaya sa Wish Ko Lang ang format, pero hindi natupad ang wish nila na talunin ang show ng Channel 7.

Ngayon ang ginawa nila ay sinulot nila ni Bernadette, pero sa palagay namin hindi pa rin mangyayari ang wish nilang talunin ang Wish Ko Lang.

* * *

Nasalubong namin ang isang dating male bold star, at obvious na nakaakbay siya sa isang matanda nang bading. OK lang kung bading eh. O kaya matanda. Pero pinagsama mo iyong matandang bading at nakaakbay doon ang male bold star, parang hindi magandang tingnan talaga. Kahit na mangatwiran pa sila later on na wala naman silang ginagawang masagwa, wala nang maniniwala.