Bagong album nina Regine at Ogie sa Viva

Kaugnay ng tambalan nina Regine Velasquez at Ogie Alcasid sa konsiyertong pinamagatang The Songbird and The Songwriter: Journey Of Love... Music To Remember, isang espesyal at bagong album na hatid ng Viva Records ang inilunsad para dito.

Ang naturang proyekto ang kauna-unahang album nina Regine at Ogie. Tampok dito ang mga awiting kanilang pinasikat na naging titulo ng mga pelikula at nag-number one sa countdown ng mga radio stations. Masasabi rin na karamihan sa mga awitin ng dalawang sikat na singers na ito ay nagsilbing mga theme song ng mga magkasintahan.

Kabilang sa mga awitin ni Regine na nakapaloob sa album ay ang "Pangako", "Kailangan Ko’y Ikaw" at "Pangarap Ko Ang Ibigin Ka". Samantala, ang mga kanta naman ni Ogie ay ang "Kailangan Kita", "Ikaw Sana", "Huwag Kang Mawawala", "Magpakailan Pa Man" at "Sana."

Tampok din sa album ang duet ni Regine at Ogie ng "Pangarap Ko Ang Ibigin Ka," "Hanggang Ngayon" at "Sa Piling Mo," ang love theme ng pelikulang Captain Barbell.

Mabibili na ang album na ito sa lahat ng record outlets. At sa lahat Odyssey XL outlets, lahat ng bibili ng album ay may pagkakataong manalo ng tickets at posters para sa konsyertong The Songbird and The Songwriter: Journey of Love... Music To Remember na nakatakdang ganapin sa Araneta Colisuem sa February 13 at 15. Ngunit mula February 1 hanggang 29, meron din special gift items na maaring mapanalunan mula sa Viva Records.