Angelica Jones, hot na hot nang makipag-date

Si Judy Ann Santos ang naging special guest ni Angelica Jones sa birthday party nito kamakalawa na ginanap sa Downtown ng Hotel Rembrandt. Mangiyak-ngiyak si Angelica at ang mommy nito na si Mrs. Beth Jones nang dumating si Juday kasama ang Eagles, ang law-enforcement team sa Basta’t Kasama Kita na kinabibilangan nina Lito Pimentel, Rommel Padilla, Hyubs Azarcon at ilan pang kaibigan.

Galing si Juday sa taping ng BKK. Halatang nag-enjoy ito ng husto sa party dahil sa isang sulok ng venue ay nakita ko itong tawa nang tawa.

Bukod kay Juday, dumating din sina Carlos Agassi, Aubrey Miles, Aiza Marquez, Alma Concepcion, Madame Auring at marami pang iba.

Nakisaya rin ang staff ng Masayang Tanghali Bayan at The Buzz kung saan mainstay si Angelica. Hindi nakarating sina Vhong Navarro at Long Mejia, ang dalawang lalaking nali-link kay Angelica dahil may trabaho ang mga ito.

Present ang malalapit na kaibigan ni Angelica sa press at manager niyang si Freddie Bautista.

Ang wish ni Angelica sa kanyang 21st birthday ay, "Sana payagan na ako ni Mommy na makipag-date kasi 21 na naman ako."

* * *

Ang taas-taas ng energy lately ni Carlos Agassi. This is due to the fact na hindi nawawala sa top over-all primetime shows ang show niyang Victim. Since its pilot airing, number one ito for nine straight weeks sa timeslot nito tuwing Saturday night. Kaya puspusan si Carlos kasama ang staff ng show sa pag-iisip ng mga bagong drama para mas maging exciting pa ang show.

Bumagay talaga kay Carlos ang pagiging host niya ng isang reality-TV show. Mukhang lie-low na muna siya sa paggawa ng teleserye.

"Itong Victim, madugo ang shoot," sabi nito. "Imagine, lahat ng segments, kailangang andun ka. E kung everyday ang shoot, everyday din ako andun sa scene. Plus ’yung editing pa. Daig ko pa ang nagti-taping ng soap opera. But I am very thankful dahil I have a very hardworking and patient staff."

Bukod sa pagiging host, 2nd unit director din si Carlos ng show. Present siya during brainstorming.

Sila ni Mr. Johnny Manahan pala ang nakaisip ng concept ng Victim. Nasa America sila noon at napanood ang isang TV show at nagkaroon sila ng idea na gawin ang Pinoy version nito.

Natatawang ikinwento ni Carlos na kahit saan siya magpunta ay ‘victim’ na ang tawag sa kanya. Pati raw mga kaibigan niya ay may fear na ngayon na ma-victimize sila ni Carlos. Ang ikinakatwiran na lang niya, "At least, sikat na!" ’Di ba’t pawang mga sikat lang ang nabi-victim ng show?

Mula sa pagiging segment sa ASAP Mania, isa nang full-length TV program ang Victim. Tulad din ng Star In A Million na dati ay segment lang sa ASAP Mania.

* * *

Iprinisent ng ABS-CBN sa isang presscon ang limang main hosts ng ASAP Mania. Ito ay kinabibilangan nina Gary Valenciano, Zsazsa Padilla, Kuh Ledesma, Vina Morales at Piolo Pascual. Bago ang presscon ay nagkaroon muna ng contract-signing para sa show ang limang hosts.

Pawang excited ang limang hosts sa pagiging main hosts ng ABS-CBN Sunday musical program. Sa lima, si Piolo ang maituturing na baguhan sa performing. Kaya ayon sa kanya, malaking karangalan ang makasama sina Gary, Zsazsa, Kuh at Vina sa isang show.

"I am learning a lot from them. Ang galing kasi, they give me pointers especially in singing. Nakakataba ng puso to be working with real pros," sabi ni Piolo.

Pareho naman ang katwiran nina Gary at Kuh when asked kung bakit na-convince sila na pumayag na magkaroon ng regular show sa TV.

"I think, ASAP Mania is the best avenue to reach out to people around the world," sabi ni Gary. "Plus the fact that you are sharing your talent with the new performers, it gives me a great feeling."

Sabi ni Gary, noon ay ayaw talaga niyang makuha ang Sunday niya dahil naka-devote ito sa kanyang pamilya. "But my kids are grown-ups. Less na ’yung time na kailangan mo silang tutukan unlike noong mga baby pa talaga sila. And they were the ones who encouraged me to be in ASAP," sabi pa ni Gary.

Vina naman is thankful to ASAP Mania dahil lumalawak ang kanyang market as a performer. Hindi makakalimutan ni Vina ’yung feedback na nakukuha niya kapag nagsu-show siya sa iba’t ibang bansa. "Vina, ang husay-husay mo sa ASAP!" ito raw ang laging sinasabi sa kanya ng tao.

Pinaka-exciting segment ng ASAP Mania ay ang "Music Box" at "ASAP By Request". Hindi pa rin mawawala ang "ASAP Versus", "ASAP Versions" at "Rated R".

Year-long ang ginagawang celebration ng ASAP Mania ng kanilang 10th anniversary. Sa October 10 ay magkakaroon ng isang malaking anniversary celebration ang show to highlight their 10 years in existence.