May bago ng gf ang actor/politician

May balita na matapos ang iskandalong nangyari sa dalawang magsing-irog na ito ay nagkikita raw silang muli. Pero sori na lang kung totoo man ito dahil huwag nang umasa pa ang TV host na magkakasundo silang muli ng dating nobyo.

May nakapagbulong na ang mahiwagang babae na gumamit ng code name at naging sanhi ng malaking pag-aaway nila noon ay siya palang nobya ngayon ng actor-politician na hindi taga-showbiz. Sweet daw ang dalawa kaya malabo nang matupad ang pangarap ng TV host na magkakasundo sila ng actor-politician at pakakasalan siya nito someday.

Matapos ang kanilang paghiwalay ayon pa sa aking source ay tipong seryoso na ang actor politician sa kanyang bagong non-showbiz girlfriend.

Ipinahipo Ang Boobs

Puspusan na ang rehearsal ni Priscilla Almeda para sa stage play na Butterflies Are Free. Excited na ang magandang aktres sa kanyang pagbabalik-entablado. Ito’y isang sexy play kaya nagpapayat ito ng husto. May isang bahagi ang stageplay na naka-bra at panty lang ito at ipahihipo niya ang kanyang dibdib sa kaparehang si Joel Trinidad na role ay isang bulag.

May dalawang lovescene sina Priscilla at Joel. Ang Butterflies Are Free ay ipalalabas sa Republic of Malate sa December 12 sa ganap na ika 8:00 ng gabi.

Seiko, Bilib Kay Direk Jeturian

Tapos na ang syuting ng Bridal Shower at tiyak nang sasali sa Metro Manila Film Festival sa taong ito. Akala nga namin ay di ito makakahabol sa deadline na itinakda ng executive committee para sa pagsusumite ng final cutprints.

Binusisi mabuti ni Direk Jeffrey Jeturian ang pelikula na umikot ang istorya sa tatlong bidang babae na sina Dina Bonnevie, Cherry Pie Picache at Francine Prieto.

Bilib nga si Robbie Tan sa director dahil pagdating sa makahulugan at artistic films ay nangunguna ito batay sa survey na ginawa sa campus ng iba’t ibang unibersidad. Paborito si Jeffrey ng mga estudyante dahil nagustuhan nila ang Pila Balde.

Tiyak na magugustuhan din ang Bridal Shower ng mga manonood ayon pa kay Robbie na ang tema nito ay mala — Sex In the City ang dating.

Nanghihinayang Kay Francine

Modelo ng isang produktong pampaganda si Francine Prieto pero nagtipid ang advertiser at ang presidente ng kompanya ng Cleanse kaya’t hindi siya nagpo-promote. Nanghihinayang sila dahil sikat na sexy star ngayon at malaking bentahe ito para maraming tumangkilik sa kanilang produkto.

Naniniwala sila na may midas touch si Robbie at sa pamamagitan niya ay mapasikat din ng Seiko si Francine gaya nang ginawa nito kay Priscilla Almeda, Rosanna Roces at Diana Zubiri.

Hindi lang nakakatuksong alindog ang taglay ni Francine kundi ang talino sa pag-arte gaya nang ipinakita nito sa Liberated at ngayon naman ay sa Bridal Shower sa darating na film festival.

Pangalagaan Ang Kapaligiran

Kung napaganda ni Mayor Lito Atienza ang Kamaynilaan lalo na sa kahabaan ng Roxas Boulevard gayundin sa Avenida at Quiapo ay ganito rin ang nagawa ni Mayor Rey Malonzo para sa Kalookan. Sa tulong ng kanyang maybahay na si Madam Gigi Malonzo na Chairman ng Cultural at Tourism Affairs sa lungsod ay maganda rin ang Monumento ngayon ni Bonifacio.

Sa Historical Walk idinaos kamakailan bilang pagpaparangal kay Andres Bonifacio ay sinindihan ang magagandang ilaw sa kalagitnaan ng EDSA hanggang sa Monumento at mayroon na itong fountain at shrine ni Dr. Jose Rizal.

Sa maikling talumpati ni Gigi ay binibigyan nito ng halaga ang mga magagandang pagbabago sa lungsod kaya naibalik ang Dangal ng Caloocan.

Bukod sa kanyang Okay Ka Mom sa Channel 5 ay may radio program pa rin ito sa Radyo ng Bayan na pinamagatang Uno Por Dos kasama si Bobby Guanzon at Mayor Malonzo kung saan araw-araw ay tinatalakay ang mga current issues ng bansa gaya ng droga at kidnapping. Ito’y mapapakinggan tuwing 10:30 a.m. hanggang 12 n.h. araw-araw.

Hindi Marunong Mag-Alaga

Ngayong pinagaganda na ang kapaligiran natin sa iba’t ibang bahagi ng Kamaynilaan ay dapat lang na pahalagahan natin ang ginagawa ng mga alkalde pero nakakalungkot isipin nang minsang napadaan kami sa may Abad Santos ay basag-basag na ang mga ilaw na nakadikit sa bakod ng halaman. Hindi kaya mga addict o rugby o solvent boys ang gumagawa nito kapag napagtitripan nilang mambasag ng mga ilaw?