Nakilala sa toilet commercial

Ayon sa baguhang si Ced Carrion ay na-out-of-count na siya sa bilang ng mga nagawa niyang komersyal sa print at sa TV man. Ang naalala niyang pinakamatindi na nagawang endorsement ay iyong nasa loob siya ng toilet para "umetsas" at sumambulat ang aroma ng kanyang waste matter. "Nagdadalawang isip ako nang i-offer sa akin ’yong bathroom deodorizer dahil sa posibleng toilet humor na itutukso sa akin. Pero naisip ko na trabaho lang ito at magandang exposure para sa akin at ang maganda, malaki-laki rin naman ang aking naging bayad dito."

Mula nang napanood ang naturang komersyal sa telebisyon ay marami siyang natanggap ng panunukso na itinuring nitong positibong bagay dahil nakagawa siya ng marka sa nasabing komersyal. Inisip nito na sa lahat ng gagawin nitong komersyal sa hinaharap ay hindi naman ganoon at ganoon lang ang kanyang gagawin. "I can still do a product endorsement of the same kind pero depende iyon sa concept ng campaign. Dapat I’ll get a positive thing out of it."

Pinasok na ngayon ng baguhang aktor ang pag-aartista at naka-ilang pelikula rin siyang nalabasan na suporta sa mga bida. Napapanood din siya sa top rating na dramedy nina Judy Ann Santos at Robin Padilla, ang Basta’t Kasama Kita. — Alex Datu