DVD, VCD player, tapon na kapag nasira

Bakit mga tapes and discs na sinasabing pirated lamang ang ipinagbabawal na ipagbili? Dapat pati yung mga DVD at VCD players din. Isa ako sa nabiktima nito gayong marami na ang nagsabi sa akin at nagpayo bago ako bumili na maiikli lamang ang buhay ng mga mumurahing DVD at VCD players na nagkalat sa Greenhills. Disposable raw ito. Hindi ako naniwala, bumili ako sa Greenhills ng DVD player at wala pang isang taon sira na ito. At totoo rin na hindi na ito nari-repair!

Kung totoong pirated ang mga ito bakit ang mga pirated discs lamang at tapes ang bawal? Ba’t hindi pati ang mga players? Bakit ang mga kinukumpiska ay mga bala pero never ang mga players?

* * *

Ngayon pa lamang ay marami na ang umaasa na sana ay si Edu Manzano ang i-appoint ni Pangulong GMA para makapalit ni Bong Revilla bilang chairman ng Videogram Regulatory Board o VRB.

May sapat na kakayahan si Edu para pamunuan ang VRB. Naging pangulo siya ng Kapisanan ng mga Artista ng Pelikulang Pilipino, dating KAPP. Marami ang pwedeng magsabi kung ano ang mga nagawa niya bilang pinuno ng mga artista.

Naging bise alkalde rin siya ng Makati.

Tungkol naman sa tapang na kinakailangan ng isang namumuno ng VRB, sinabi ni Edu na "Kakayanin ko kung ipagkakatiwala sa akin. Pero, kung hindi naman okay lang, tutulong pa rin ako sa sarili kong pamamaraan," anang aktor na buong araw yatang nakikita sa TV dahilan sa kanyang mga programang Magandang Umaga Bayan, ASAP Mania, Showbiz Sabado at OK Fine Whatever.

* * *

Sa Sabado,Oktubre 25, magsasama-sama ang mga musikero ng nakaraang limang dekada para sa isang malaking palabas na magaganap sa Araneta Coliseum.

Pinamagatang DZRJ’s 40th: The Grand Reunion, ihahandog ito ng Globe Handyphone sa pamumuno ni Ramon "RJ" Jacinto, the man behind the station DZRJ. Makakasama niya ang mga artists nung taong 60s hanggang sa kasalukuyang panahon. Gaya nina Jose Mari Chan, Joey Pepe Smith, Freddie Aguilar, Jolina Magdangal, The Rage Band, Andrew E., Pilita Corrales at si Sampaguita.

Tutugtugin ng mga malalaking banda ang kanilang mga signature numbers: RJ and the Riots para sa 60s; Hotdog and Boyfriends para sa 70s; The Dawn para sa 80s; Pido with Take One para sa 90s; Barbie’s Cradle and Moonstar88 para sa bagong milenyo.

Makiki-jam sina Elizabeth Ramsey at Jaya kay RJ. Ang dalawang local Elvis Presley, sina Edgar Opida at Boy Sanchez at pati na ang piyanistang si Raul Sunico ay magra-rock and roll!

Completing the line- up of 25 bands and solo performers are Leah Navarro, Karylle, Mitch Valdez, Janet Basco, Louie Heredia, Ernie Delgado ng Electromaniacs, Asin, Aegis, Hi-Jacks, Moonstrucks, Cowboy, Father & Son at marami pa.