Heart at John may nabubuong romansa

Hindi na gimik ang tandem nina John Prats at Heart Evangelista na dinisenyo ng ABS-CBN para palaganapin ang loveteam ng dalawa. Mayroon nang namumuong romansa sa pagitan ng dalawa, na inamin nila mismo sa presscon ng kanilang pelikulang My First Romance, isang novelty romance movie na nagtataglay ng dalawang nakakakilig na episodes.

Ang unang episode ay pinamagatang One Love at nagtatampok kina John at Heart sa direksyon ni John D Lazatin. Istorya na kung paano pinaglapit ng pag-ibig ang dalawang mortal na magkaaway sa campus, ang scholar na si Che at ang student leader na si Jackie.

Kasama nila sa episode sina Susan Afrika, Cherie Gil, Ate Glow at Pauleen Luna.

Si Don Cuaresma ang nagdedebung direktor sa pelikula, sa kanya ang episode na tinatampukan nina John Lloyd Cruz at Bea Alonzo na pinamagatang Two Hearts. Si Mel del Rosario ang sumulat ng kwento tungkol sa isang soccer player, si Enzo, na nabigyan ng heart transplant mula sa fiance ni Bianca (Bea). Nagkakilala at nagkaibigan ang dalawa pero, di sigurado si Bianca kung mahal niya si Enzo o ang puso ng kanyang namatay na nobyo. Kasama sa episode na ito sina Miko Palanca, Kathleen Hermosa, Chanda Romero, Joel Torre, Mandy Ochoa, Chat Silayan at Dominic Ochoa.

Going back to John and Heart admitting their MU (mutual admiration ba o mag-on?), inamin ni Heart na kulang na lamang na sagutin niya si John para mabuo ang kanilang relasyon. "I love him (John) because he is a good man, a good person," sabi nitong with sincerity. "At pinayagan na ako ng daddy ko na maligawan kaya formal ko nang sinasabi na nanliligaw si John sa akin," dagdag pa ni Heart.

Pero, kung sino sa dalawang tandem ang mas makakapag-bigay ng kilig sa manonood ang siyang makikita sa pagpapalabas ng My First Romance sa October 29.

* * *

Nakikiramay ako sa mga naulila ni Julie Fe Navarro na namatay nung Martes sa sakit na cervical cancer sa Makati Medical Center. Si Julie ay dating entertainment editor ng People’s Tonight at isa ring radio announcer ng DZRH. Una ko siyang nakilala nung sumasali-sali pa ako sa Night Owl Dance Party, isang dance program sa dating Channel 11 hosted by Lito Gorospe. Fashion annotator siya sa show which showcased the designs of Nick Libramonte.

Condolence rin sa mga naiwan ng isang kasamahan sa panulat na si Hermie Francisco. Nakaburol ito sa PhilamHomes Chapel.