Marvin, hindi naniniwala sa hula

Hindi nababahala si Marvin Agustin sa hula na isa siya sa mga showbiz personality na kundi mag-iingat sa taong ito ay posibleng maaksidente. Naniniwala ang aktor na naalpasan nito ang naturang hula dahil kamakailan lamang ay na-confine siya sa hospital dahil sa matinding karamdaman sa tiyan.

Pagdating naman sa pagda-drive ng sasakyan ay nakakasiguro ang aktor na walang aksidenteng mangyayari sa kanya dahil matagal na siyang nagmamaneho.

Kung ang iba ay apektado sa di kagandahang hula, ang aktor naman ay natutuwa sa mga hula dahil para sa kanya ay paalala ‘yon na kailangan niyang mag-ingat para makaiwas sa anumang panganib. Marami ang tumawag sa aktor nang nabasa ang pangalan nito sa isang tabloid (hindi sa PSN) na nakasama siya sa hinulaang may di magandang mangyayari sa kanya sa taong ito.

Ayaw namang magawang magalit o manumbat sa kilalang manghuhula ang aktor dahil trabaho lang naman ang ginawa noong manghuhula. "Alam naman nating lahat na ang hula ay puwedeng magkatotoo at puwedeng hindi dahil hula lang ito. Ang alam natin ay Diyos lamang ang nakakaalam kung ano ang mangyari sa atin ngayon, bukas at sa hinaharap. – Alex Datu