Mahal nagpabanat ng mukha

Maraming naninibago ngayon kay Mahal dahil may nakikitang pagbabago sa kanyang mukha lalo na sa parte ng kanyang magkabilang pisngi. Ayon sa bulilit na bituin ay ipinabanat niya ito sa isang beauty center sa may West Avenue na nagkaroon ng konting kontrobersya noon dahil isang sexy star ang nagreklamo pagkatapos nitong magpalaki ng kanyang boobs dahil nagkaroon umano ito ng konting problema.

Walang problema iyon sa bulilit na bituin dahil ang ipinaayos lang nito ay ’yong kanyang pisngi na ayon sa kanya, natuwa siya sa naging resulta dahil naging maumbok ngayon ang kanyang munting mga pisngi na dati ay humpak. "Wala akong ibinayad sa pagpapabanat ng pisngi ko dahil TY lang ito. Sponsor ko ang may-ari kaya mali iyong balita na malaki ang ibinayad ko dahil libre nga ito."

Isang ngiti ang ibinigay ni Mahal sa amin nang sabihin namin na kaya ito nagpapaganda ay dahil kay Kiro ng Masculados. Inamin naman nito na nagpapalitan sila ng text messages pero hindi pa raw siya niyayang lumabas para kumain o di kaya’y manood ng sine. – Alex Datu