Emilio hindi nasira ang acting sa naghuhubad na si Red

Ang aktor na si Emilio Garcia ay mapapanood muli sa pelikulang Kiskisan kung saan ay kapareha niya sina Red Riviera at Halina Perez. Ang pelikulang ito ay tungkol sa dalawang magkapatid (si Emilio, at ang gumanap na kapatid niya ay si Gardo Versoza, ang isa pang bida sa pelikula) at ang kanilang sibling rivalry, isang modern day Cain at Abel. Pati mga babae sa buhay nila ay pinag-aagawan nila. Kabilang na rito ang baguhang bold star na si Red Riviera, at ang napakagandang si Halina Perez. Kasama rin dito ang award-winning actress na si Ana Capri, na gumanap bilang kapatid ni Emilio at Gardo, at si Allen Dizon, bilang asawa ni Ana.

Siyempre, maraming mga seksi at daring na eksena sa pelikula. Nagpatalbugan sina Red at Halina, at sa pagganap, nagpagalingan sina Emilio at Gardo. Maraming mga nakakakiliting eksena. Super daring talaga itong si Red Riviera sa paghuhubad. Si Red din ay tumakbo sa mga kiskisan at rice fields ng San Miguel, Bulacan na nakahubad. Si Halina naman ay dating dancer sa night club na naging asawa ni Emilio. Marami silang mga maiinit na eksena rito, pati na rin sina Halina at Gardo. Pinaka-daring role raw ni Halina ang papel niya sa Kiskisan. Ngunit di nagpahuli itong si Emilio sa pagganap. Marami ang nagsasabing napakagaling niya rito bilang ambisyosong kapatid. Abangan ang Kiskisan sa ika-1 ng Oktubre.