Apat na anak ang gusto ni Mikee

Tatlong oras sa isang araw at limang beses sa isang linggo ang ginugugol ni Mikee Cojuangco-Jaworski sa kanyang pag-iensayo ng horseback riding kung minsan ay isinasama niya ang kanyang panganay na anak na si Robbie na nagkakahilig na ring mangabayo.

Sa murang edad, parehong mahihilig sa sports ang dalawang anak ni Mikee na sina Robbie (3) at Rafael (1). May pinagmamanahan dahil pareho sila ng kanyang mister na si Dudut na mahilig sa sports–si Mikee sa pangangabayo at si Dudut naman sa basketball. Ito rin ang dahilan kung bakit maganda ang kanilang pangangatawan.

Kung si Mikee ang masusunod, gusto niyang magkaroon sila ni Dudut ng apat na anak. Since meron na silang dalawang boys, umaasa siya na magkakaroon sila ng dalawa pang anak na babae.

Samantala, aminado si Mikee na nagi-enjoy siya sa kanyang bagong hosting job sa All About You ng GMA-7 na tatagal ng thirteen weeks o isang season. Si Mikee bale ang pangatlong host ng programa na sinimulan ni Lucy Torres-Gomez at sinundan naman ni Dawn Zulueta-Lagdameo.

* * *

Kung ang comedy king na si Dolphy lamang ang masusunod, gustung-gusto na niyang pakasalan ang kanyang live-in partner for the past 14 years. Pero hanggang ngayon ay hindi pa rin naaaprubahan ng korte ang annulment case ni Zsazsa Padilla sa kanyang dating mister na si Dr. Modesto Tatlong Hari dahil hindi yata nakikipag-cooperate ang dating mister ni Zsazsa.

May isang anak na dalaga si Zsazsa sa dati niyang mister si Karylle na isa ring mahusay na mang-aawit tulad ng kanyang ina at isa sa mga mainstay ng SOP. May isang anak naman si Zsazsa kay Dolphy, si Zia liban pa sa kanilang adopted daughter na si Nicole.

Sa edad na 75, wala ni isa mang babae ang pinakasalan ni Dolphy at si Zsazsa pa lamang ang kauna-unahang babae na kanyang pinangakuan ng kasal dahil ito na umano ang huling babae sa kanyang buhay.

Si Dolphy ay may 18 anak sa limang magkakahiwalay na babae. Sa 18 anak, lima ang kanyang anak na babae — sina Marquita, Shalee, Madonna, Nicole at Zia habang ang 13 ay pawang lalake.

Ang ibang celebrities na na-link noon kay Dolphy ay sina Baby Smith (ina ng magkakapatid na Eric, Ronnie, Madonna at Jeffrey) Pilar Pilapil, Lotis Key at Alma Moreno kung kanino siya nagkaroon ng isang anak, si Vandolph.

* * *

Sumunod na rin sa yapak ng kanyang mga magulang ang 14-year-old na si Alyssa Gibbs, ang panganay sa dalawang anak na babae ng mag-asawang Janno Gibbs at Bing Loyzaga.

Sabagay, hindi naman kataka-taka dahil bukod kina Janno at Bing, may showbiz lineage si Alyssa magmula pa sa kanyang great grandparents. Lolo ni Alyssa ang mahusay na actor na si Ronaldo Valdez at lola din n’ya ang dating aktres na si Liberty Ilagan na kapatid naman ni Baby Gibbs, ang asawa ni Ronaldo. Tiyahin din ni Alyssa ang singer-actress na si Melissa Gibbs habang tiyuhin naman niya ang yumaong si Jay Ilagan.

* * *

Mapa-action, comedy at drama at mapabida o kontrabida man, pasok ang veteran at award-winning actor na si Eddie Garcia. Matapos itong mapanood sa hard action movie na Masamang Ugat na pinamahalaan ni Willy Milan sa ilalim ng Viva Films, balik-comedy na naman si Manoy sa pelikulang Asboobs na dinirek ni Danny Cabriera na siya ring producer ng pelikula.

Natutuwa si Manoy Eddie sa bago niyang comedy movie dahil katrabaho niya ang mga bagong henerasyon ng mga comedians tulad nina Long Mejia, Bearwin Meily, Jeffrey Quizon, Dencio Padilla, Jr., Vhong Navarro, Paolo Contis at Bayani Casimiro, Jr. Kasama rin sa pelikula si Nancy Castiglione at ang sexy na si Jenny Miller.

Ang Asboobs ay nagmula sa pinagsamang salita na ‘asal bobo’.

* * *

< [email protected] >