Vina takot mag-asawa

Ilan na ang naging boyfriend ni Vina Morales gaya nina Keempee de Leon, Miguel Zubiri, Roy Ofek at Robin Padilla. Napabalita rin na naging ka-on nito si Trade Sec. Mar Roxas. May nabalita nga na nagpakasal na silang dalawa ni Mar pero laging sinasabi ng aktres, hindi iyon totoo. Magkaibigan lang daw sila.

Kung tutuusin, nasa tamang edad na si Vina para lumagay sa tahimik. Naunahan na siya ng mga kaibigang sina Ruffa Gutierrez at Donita Rose. Ang mga kasamahan niya noon sa That’s Entertainment ay may mga asawa’t anak na. Sa kabila nito, sinasabi ni Vina na masaya pa rin siya at naka-concentrate ngayon sa kanyang mga negosyo. "Maunlad na ang aking Ystilo Beauty Salon at mayroon na kaming 16 branches. May bubuksan pang 15 branches sa taong ito. Kahit may gustong mag-franchise nito sa abroad ay gusto kong dito muna sa bansa magbukas lalo na sa iba’t ibang panig ng lalawigan. Mayroon din akong pinatatakbong warehouse ng Coke sa Cebu na mina-manage ng partner ko at poultry na may 30,000 sisiw na kami rin ang growers at may kumukuha nito para rin ibenta," aniya.

Kahit walang pelikula ay may pinagkakaabalahan naman itong soap opera.

JACKY, ABALA SA ‘ALAB NG LAHI’ PROMO

Dumating na si Jacky Woo sa bansa kung saan abala na sila ni Robin Padilla sa promosyon ng Alab ng Lahi na entry nila sa darating na Manila Film Festival. Nagsimula ang promosyon sa SM North noong Mayo 21 at ang sunud-sunod na Linggo ay nasa SM Sucat, SM Bicutan, SM South, SM Bacoor at SM Manila sa June 8 ang dalawa kasama ang iba pang artista.

Sasali rin ang international action star sa Santakrusan sa May 30 at parada sa Hunyo 9 naman sa Grand Boulevard.

First time ni Jacky na makibahagi sa film festival kaya excited na ito lalo pa at talagang ipinagmamalaki nila ni Robin ang kanilang period movie na ginastusan ng 30 Milyon dahil ginamitan ng Dolby Digital sound at

daan-daang extra.

BLIND ITEM: DI MAKASAYAW ANG SEXY STAR

Naimbitahan ang sikat na sexy star para sumayaw sa isang karaoke bar na dinarayo ng mga kalalakihan. Syempre enjoy sila habang pinapanood ang guest sexy star na halos nakahubad na sa kanyang two-piece bikini. Halos lumuwa na rin ang kanyang dibdib kaya nag-iinit sa kanilang mga upuan ang mga lalaki habang umiinom ng beer.

Kaso hindi gaanong makagiling ang sexy star dahil nasa harapan at nanonood ang kanyang Chinese boyfriend na super seloso. Paano nga naman makakapag-emote ang aktres na napaka-sexy pa naman kung matatalim ang titig sa kanya ng nobyo?

Ang ending, nagalit ang may-ari ng karaoke bar sa manager ng sexy star. Sumumpa ang may-ari na hinding-hindi na nila iimbitahin ang sexy star dahil lagi pa lang nakabuntot ang selosong nobyo nito.