Balik-bida si Bayani

Ngayong Lunes, magbabalik ang komedyanteng si Bayani Agbayani sa kanyang pinagmulan. Sa bagong episode na ito ng Bida si Mister, Bida si Misis, na ie-ere pagkatapos ng Kay Tagal Kang Hinintay ng ABS-CBN, babalik si Bayani sa kanyang role bilang ang palpak na assistant pulis na si Joe kasama ang mga dating co-star niya sa Kaya ni Mister, Kaya ni Misis na sina Cesar Montano at Maricel Soriano.

Sa simula ng episode, tumutulong si Buboy Magtanggol (Cesar Montano) sa isang stakeout, pero pumalpak ito dahil sa kanyang mga bagong assistant na sina Wayne (Smokey Manaloto) at Mac (Earl Ignacio). Sa inis ng kanilang boss na si Chief Pipay (Dyords Javier), kumuha ito ng isang expert na army major upang tumulong sa kanilang gumawa ng isang tamang stakeout. Laking gulat na lang ni Buboy nang makita ang major – na walang iba kundi si Joe!

Ang pagkagulat naman ni Buboy ay mabilis na napalitan ng inis, dahil ginagamit din ni Joe ang kanyang posisyon para masunod ang gusto nito. At dahil nga sa mas mataas ang tungkulin ni Joe kay Buboy, napipilitang pumayag ang huli – kasama na ang muling pagtira ni Joe sa bahay nila ni Maricel Soriano, at ang paggawa nito ng mga plano sa paghuli ng druglord na hinahanap ng Task Force K.

Paano kaya matatagalan ng pamilya Magtanggol ang kanilang bagong bisita? Magtagumpay kaya ang mga plano ni Joe para sa Task Force K? At magtagal kaya ang pagtitimpi ni Mary sa kakulitan ni Joe? Tunghayan ito at ang lahat ng katatawanan sa guesting ni Bayani Agbayani sa Bida si Mister, Bida si Misis ngayong gabi.