Baguhan ayaw sa papel na bading

Ayaw ma-typecast ni Karlo Enriquez na bakla sa kanyang mga papel na gagampanan sa commercial, stage play at pelikula.

"Matagal na akong gumaganap ng papel ng alanganin at gusto kong mawala sa akin ang image na iyon," esplika ng baguhang matinee idol ang dating.

Unang nakatawag-pansin si Karlo sa commercial ng PLDT, ’yung "Billy" na ginagampanan ni Carlo Muñoz at sa nakakaalala sa naturang commercial sa TV, malakas ang dating doon ng bading na kaibigan ni Billy na si Karlo ang gumanap. "Malaking utang na loob ko sa papel ko doon na bading at ang lakas ng recall noon sa mga tao. Alam kong malaking aspeto iyon kaya may pelikula na ako ngayon."

Napapanood si Karlo sa ongoing stage play ng PETA, ang Rene Villanueva: A Trilogy, gagampanan nito ang isang lumpo sa unang istorya at bilang sakristan sa ikatlong istorya kung saan kasama nito sina Wowie de Guzman at si Dante Balboa na nagbigay ng maiinit na eksena. "Sana simula na ito na makawala ako sa gay role. Sa movie na bida si Aubrey Miles ay papel ng isang sakristan ako doon na umiibig sa bidang babae," pahayag ng tinitiliang karakter sa stage play na palabas sa Rajah Sulayman theater. – Alex Datu