Onemig, tinatalo si Kristine?

Tuluy-tuloy na talaga ang pagdagsa ng projects kay Onemig Bondoc. Sunud-sunod ang pelikula niyang ipalalabas. Una ay ang Ngayong Nandito Ka bilang ka-love triangle nina Jericho Rosales at Kristine Hermosa. Isa ito sa masasabi ni Onemig na biggest break niya pagdating sa movies. Kaya nga matindi ang paghahandang ginawa niya para sa role.

"When I got the script, immediately, ininternalize ko ‘yung character," kuwento ni Oneming. "I also request for few days of acting workshop para sa role ko. Ayoko kasing ma-fail ang tao sa performance ko sa movie."

Nitong mga huling araw ay naintriga si Onemig as the reason daw ng paglamig ng relasyon nina Kristine at Jericho. Kapag nagkakatampuhan daw kasi sina Echo at Tin ay kay Uno (palayaw ni Onemig) tumatakbo si Tin.

"May times na gano’n pero pareho ko silang kaibigan. Ayoko lang maipit sa kanila dahil hindi naman tumatagal ang tampuhan nila, after a few hours, okey na sila."

Itinanggi ni Onemig na nililigawan niya si Kristine. "We’re friends talaga. When I transferred to ABS-CBN, si Kristine ang mga una kong naging kaibigan. Nakatrabaho ko rin siya sa four episode stint ko sa Star Drama Theater Presents. Hanggang ngayon, we’re still close," pahayag ni Onemig.

Sa nasabing movie, all praise si Onemig hindi lang sa kanyang co-stars kundi pati kay Jerry Sineneng, ang director ng movie.

"Working with Direk Jerry is really an experience," sabi ni Onemig. He always has something new to offer. Malaki ang ibinigay niyang support sa akin."

Showing na ang Ngayong Nandito Ka sa February 26. Kasama rin sa movie sina Carlo Muñoz, Dianne dela Fuente, Justin Cuyugan, Steven Alonzo at introducing sina Jenny Miller at Cindy Kurleto. Si Divo Bayer, Star Quest runner up, ang kumanta ng theme song ng movie.

Come March ay showing naman ang isa pang movie ni Onemig, ang Message Sent under Legacy Films. Kasama rin si Onemig sa new soap opera ni Claudine Barretto ngayong March.

* * *

Kamakailan ay may isang cancer patient na pinasaya si Dominic Ochoa. Kuwento ng isang kaibigan ko, "Actually, naikwento ko lang kay Dominic one time na isang cousin ko ang gusto siyang makita. Syempre, kapag ganyang may sakit ang isang tao, ang gusto lang naman nila is ‘yung little joy para mabawasan ‘yung pain na nararamdaman nila. Nu’ng sinasabi ko ‘yun kay Dominic, I was just telling him. Hindi ko naman alam na gagawin talaga niyang bisitahin ‘yung cousin ko.

"While on my way home, tumawag sa akin ang cousin ko para sabihin na nasa hospital room niya si Dominic. Nag-stay for one hour si Dominic at pinasaya niya ang cousin ko. Imagine, ‘yung joy na naibibigay ng isang tao sa isang may sakit," kwento ng kausap namin.

Nai-share ng kaibigan namin ang kwentong ito para ipaabot ang pasasalamat kay Dominic sa good deed na ginawa nito. Hindi rin kasi maipaliwanag ng kaibigan namin ‘yung nakita niyang saya sa pinsan niyang may karamdaman.

To Dominic, may your tribe increase.

* * *

Kung tutuusin ay birthday din ni John Prats bukas, February 14 pero dahil ispesyal na araw din ito para kay Heart Evangelista (it’s also her birthday tomorrow), nagparaya ang binata na mas ma-focus ang moment kay Heart. Sa katunayan, hindi na itinuloy ni John ang plano na mag-party. Kung ang parents lang ni John ang masusunod, gusto nilang bigyan ang anak ng birthday party pero nag-beg off nga si John.

"It’s also my special day pero iba kay Heart kasi debut niya. Once in a lifetime lang nangyayari sa isang girl ang debut kaya masaya na ako na part ako ng celebration niya," humbly says John.

Inamin ni John na magtatampo siya kung hindi siya ang magiging last dance ni Heart sa cotillon nito. May katwiran naman si John na ipaglaban na siya ang maging escort ni Heart.

"She admitted naman na I am the closes to her among sa mga guys sa showbiz. ‘Tapos ako pa ang ka-loveteam niya. So, nakakatampo talaga kung hindi ako. But I have no reason para magtampo dahil ako ang escort niya," natatawang sabi ni John.

Sa Sunday, February 16 ay magkasama sina John at Heart sa second leg ng Berks Grand Eyeball: The Mall Tour na gaganapin sa SM Southmall at 4:00 p.m. Kasama nila rito ang mga ka-Berks nilang sina Sarah Christophers, Hazel Anne Mendoza, Khalil Kaimo, John Wayne Sace, Marc Acueza, Ketchup Eusebio, Allyson Lualhati at Glaiza de Castro.

Kinagabihan naman ay ang airing ng exclusive coverage ng debut ni Heart, ang Heart At 18 at 9:30 p.m. sa ABS-CBN. Si Johnny Manahan ang director nito.