Patricia may wet scene sa concert

Di nagtagal sa presscon ng A.B. Normal College si Patricia Javier dahil kailangan itong mag-rehearse para sa kanyang concert PJ: Too Hot To Handle na gaganapin sa Folk Arts Theater sa February 12 na napasabay naman sa opening ng kanyang pelikula. "Pagod na pagod na nga ako sa aking rehearsal para mapaganda ko lang ang aking concert. Dalawa pa ang ipinu-promote ko, ang pelikula ko at concert na tiyak kong maiibigan ng mga tao.

Sa A.B. Normal College ay katambal niya si Ogie Alcasid at sa concert naman ay ang dati niyang nobyong si Marc Nelson at mga hunks na sina Christian Vasquez, John Hall at ang African-American singer na si London. Mas maiinit ang kanyang gagawin sa concert kung saan magkakaroon ito ng wet scene gaya ng ginagawa niya sa pelikula na may wet look naman.

Dahil sa pagpapa-sexy ni Patricia sa concert ay nararapat lang na ibigay sa kanya ang titulong Sexy Diva.

"Ipinagdasal Ko Na Sana’y Huwag Kong Makamukha Ang Aking Anak"

Tawa kami ng tawa sa mga kwento ni Andrew E. sa presscon ng A.B. Normal College tungkol sa kanyang anak. Marami kasi ang nagsasabi na cute ang kanyang baby. Nagbibiro nga ang iba at sinabing sana’y huwag maging kamukha niya. "Ipinagdasal ko nga kay Lord na bigyan ako ng magandang anak at sana’y huwag ko itong maging kamukha. May mga kumukuha na nga sa aking baby para maging commercial model," aniya.

Sa kabilang banda, kung gaano ang paghanga nito sa anak ay ganoon din sa kaibigang si Ogie Alcasid na kasama niya sa movie. "Genius talaga ito pagdating sa musika. Biruin mo isa na siyang balladeer, magaling pang composer at tumutugtog pa during his concert. Iba talaga siya!" anang komedyante.

Ara, Napaiyak Nang Ituro Ang Mga Kidnappers

Matagal naming nakakwentuhan si Cory Quirino sa thanksgiving party ni Ara Mina dahil sa pagkakapanalo nito ng best actress sa nakaraang Metro Manila Film Festival, kung saan ang sexy actress ang gaganap sa papel ni Cory sa pagsasapelikula ng buhay nito.

Halos lahat ng syuting ay naroon si Cory para alalayan si Ara at hanga siya sa galing nitong umarte. Sabi nga nito sa aktres "Madali mong magagampanan ang role kung nakaranas ka na ng sakit sa buhay. Have you experienced pain? Tanong nito kay Ara. Nang inamin nito na nakaranas din siya ng sakit o matinding problema ay natuwa si Cory dahil magiging madali para maramdaman ang trauma na nararanasan niya nang makidnap.

May eksena sa Cory Quirino Kidnap Story na umiyak si Ara habang itinuturo ang limang kidnappers. Naiyak din si Cory dahil naalala niya ang nakaraan kung saan tatlong taong dala-dala sa dibdib niya ang mapait na karanasan. Ngayon ay maluwag na ang kanyang pakiramdam lalo na at mabigat ang parusang naghihintay sa mga salarin.

Kumusta naman ang samahan ninyo ni Ara? Tanong namin kay Cory.

"She has an open heart at dama mo ang sinseridad nito sa isang tao. Very humble rin siya at hindi kailanman lumaki ang ulo sa kabila ng kasikatang kanyang tinatamasa. May bonding na kaming dalawa at nakatagpo ako ng mabuting kaibigan sa kanyang katauhan," sey ng magandang TV broadcaster.

Nag-share pa rin ito ng mga beauty tips lalo na sa pagpapaganda ng kutis na alaga niya at never siyang nagpapainit. Tamang pagkain at iba’t ibang bitamina (Vit. B complex, C, E at iba pa) ang iniinom nito para sa magandang kalusugan at ma-maintain ang pagiging mukhang bata.

Ayon pa rin kay Cory ay tuluy-tuloy ang syuting nila sa Quezon, Laguna at Maynila. Kailangan nila itong matapos hanggang katapusan ng Pebrero dahil ipalalabas na ito sa Marso.

Ganda 2003 Inilunsad

Naging bongga ang paglulunsad ng Ganda 2003 ng pamosong hairdresser na si Ricky Reyes noong nakaraang Martes. Napanood ang major beauty fashion presentation na binuo ng apat na bahagi ng kampanya gaya ng mga sumusunod:

Ang Gandang Pamilya, Ang Gandang Barkada, Ang Ganda Nila at Ganda ng Lola Mo, Noh? na nagpapakita kay Ms. Gloria Romero na hindi lang maganda kundi may maganda pa ring kalooban.

Blind Item: Maagang Nalaos Ang Isang Grupo Ng Kalalakihan

May nakapagkwento sa akin na nag-show kamakailan ang isang grupo ng kalalakihan na nakilala sa komersyal sa isang Northern province. Paniwalang-paniwala ang promoter na sikat na sikat ang grupo dahil lumalabas pa rin sila sa pelikula.

Heto na ang siste! Kakaunti lang ang bumili ng ticket at sa takot na baka malugi siya ay binawasan nila ang presyo ng ticket. Pero hindi pa rin pala ito kinagat ng mga tao at tuluyan ngang nalugi ang promoter dahil hindi inaasahan na kakaunti lang ang manonood sa concert.