Coney balik-GMA 7

Matagal nang hindi napapanood si Coney Reyes sa GMA-7 dahil mayroon nga siyang shows sa Channel 2. Isa nga rito ang teleseryeng Sa Puso Ko, Iingatan Ka. Pero sa isang matalik na kaibigan, si Direk Argel Joseph, pumayag siyang bumalik sa GMA-7 in tonight’s episode of Magpakailanman hosted by Mel Tiangco. Dahil hindi naman exclusive ang contract ni Coney sa Channel 2, hindi nahirapan si Ms. Redgie Acuña-Magno na kunin muli ang services ni Coney. Kung matatandaan, si Direk Argel ang nagdirek noon ng mga episodes ni Coney sa The Coney Reyes Special.

In tonight’s episode at 9:30, gagampanan ni Coney ang true-to-life story ni Linda, isang babaing handang ibigay ang buhay niya para lamang sa kapakanan ng kanyang mga kapitbahay na kanyang ipinaglalaban. Sa ending ng story, makikita ang tunay na Linda na kinapanayam ni Mel.

* * *

Pinaghirapan nina Paolo Bediones at Miriam Quiambao ang one-week special Christmas presentation ng Extra! Extra! simula ngayong araw, December 23 to Friday, December 27, 5:30 p.m. sa GMA-7. Sisimulan ngayong Lunes ang episode nila sa "Home For The Aged" na ginawan nila ng make-over ang mga lolo at lola roon. Bukod sa make-over, may show at gift-giving din sila para sa kanila.

Christmas in Benguet naman sa Tuesday ang mapapanood. Nilakad nina Paolo at Miriam sa loob ng isang oras ang bukid patungo sa isang pamilyang napili nila mula sa Ibaloy Tribe. First time ng mga itong makakita ng Christmas tree at katulong nilang nag-decorate nito ang tatlong anak ng mag-asawa. In-adopt din nila ang pamilyang ito na isinama at itinira nila sa isang hotel sa Maynila. In-advise nila ang mag-asawa na ang ipinamili nilang maraming groceries ay magtayo ng isang sari-sari store sa kanilang lugar.

Extra income naman sa Wednesday, lahat ng mga nai-feature nilang products sa show ay ibinigay sa kanila para ibenta sa mga kasamahan nila sa GMA-7. Ang pagkakaiba nito, ang bibili ang magpepresyo ng bibilhin nila. Pero may mga very generous daw na mas mataas na talagang presyo ang ibinabayad sa kanila kapag nalamang ang kikitain nila ay ido-donate sa Pediatric Ward sa Philippine General Hospital. Nakabenta sila ng almost P95,000, at nang dalhin nila doon, isinama nilang mag-show at magbigay ng gifts ang Sex Bomb Girls.

Mga fans naman ng mga artista ang tampok sa Thursday episode. Bibisitahin si Rudy Fernandez ng kanyang fan sa kanilang bahay. Nagpa-cater pa si Rudy para sa mga bisita nila, si Bong Revilla naman ay dadalawin ang fan niyang naka-confine sa PGH dahil sa leukemia.

Sa Friday, extraordinary people ang ipini-feature nila. Siya ay isang teacher sa isang day care center sa San Pablo City na sabi’y ipinaglihi sa balot ang ipi-feature nila. Isinama nila ang said teacher, kasama ang mga student niya sa day care center at maghapon nilang ipinasyal.

Ang kanilang mahuhusay na pool of researchers, ang dahilan kung bakit marami talagang sumusubaybay sa kanilang daily show.

Nalaman din namin, among the 100 top shows, sa GMA-7, ang Extra! Extra ang number 3. Ang Eat Bulaga raw ang number 1 at number 2 naman ang Mexican telenovela na Betty La Fea.

Meanwhile, dream-come true sa dalawang host na papasukin na rin ang pelikula at ang makakasama nila, ay ang parehong hinahangaan nilang sina Sharon Cuneta at Richard Gomez sa Walang Kapalit ng Viva Films at ididirek ni Joel Lamangan.

* * *

Sort of a reunion movie kina Sharon at Richard sa pagbabalik-tambalan nila sa isa sa mga compositions ni Rey Valera.

Huling nagtambal, three years ago pa ang dalawa sa Minsan, Minahal Kita ng Star Cinema.

Madalas naman noong gumanap na tatay ni Sharon si Dante Rivero, at bestfriend si Pinky Amador na gaganap namang isang battered wife. Nasa movie rin si Nanette Inventor. Ang anak niya noon sa Kapantay Ay Langit nila ni Richard na si Charina Scott ay fourteen years old na ngayon ay gaganap na eldest child naman nila ni Richard.

Samantala, Sharon will celebrate Christmas Day with her family, her Mommy Elaine Cuneta and brother Chet and his family. Sasamantalahin din niya ang Senate break ni Sen. Kiko Pangilinan kaya magbabakasyon silang mag-anak. Pero, hindi sila aalis ng bansa, dito lamang sila.